Уржигдар буюу тавдугаар сарын 17-нд видео тоглоомын үйлдвэрлэгч Disney interactive Карибын тэнгисийн дээрэмчдийн лего хувилбарыг PS3, Xbox 360, Wii, PSP, NDS, 3DS консолууд дээр бүтээснээ худалдаанд гаргалаа. Гайхамшигт легогийн түүх ийнхүү Уолт Диснейн нэгэн алдартай киногоор үргэлжилж байна. Ирэх 24-ний өдөр персонал компьютер дээрх хувилбар нь худалдаанд гарна.

Тоглоомын үйл явдал гэвэл тус киноны эхний гурван анги болоод мөн сүүлд гарсан On Stranger Tides-ийн хамтаар дөрвөн цувралыг нэг дор багцлан өгүүлсэн байх юм. Тийм ч учраас нийт тоглолтын туршид бүхэл бүтэн 70 дүр нээгдэх бөгөөд урьдын уламжлалыг хадгалаад олон олон бонус даалгаврууд, үеүүд, мөн цуглуулах олон олон сонирхолтой зүйлс нэмэгдсэн байна. Нийт 20 үндсэн үеэс бүрдэх бөгөөд нэг цуврал анги нь 5 бүлэгт багтаад гарна гэдэг нь харагдаж байгаа биз. Та тус тоглоомыг нэг ба олон тоглогчийн горимоор тоглох боломжтой.

Мэдээжийн хэрэг их усан ертөнцийн тухай өгүүлэх учир урьдын легогийн аль ч цувралууд дээр үзэгдэж харагдаагүй шинэлэг зүйлс маш ихээр нэмэгдсэн гэнэ. Илүү сайжирсан график зураглал, дуу дүрсний гайхамшиг, хөгжилтэй тоглолт, гайхалтай адал явдлуудаар үргэлжилж, эртний түүх, аймшигт зомби нар, зоригт далайн дээрэмчид, энхийг сахиулагч эзэн хааны арми, харин тэдний усан флот, эрдэнэсийн арал, хараагдсан хөлөг онгоц, далайн аварга наймаалж, энэ бүхний хамтаар хамгаас гайхамшигтай адал явдал таныг хүлээж байна.