Олон улсын валютын сангийн экс тэргүүн Доминик Стросс-Каныг Нью Йоркийн шүүх нэг сая ам.долларын батлан даалтад гаргажээ. Тэрбээр өчигдөр сангийн удирдах зөвлөлд албан тушаалаасаа огцрох хүсэлт тавьсан билээ. Яллагчид түүнийг оргон зайлж болзошгүй гэж үзэж байгаа боловч өмгөөлөгч нь түүнийг шударга төвшин хүн тул ийм үйлдэл гаргахгүй гэж мэдэгдсэн байна.

Нью Йоркийн дээд шүүхийн шүүгч Майкл Обус түүнийг батлан даалтад гаргахдаа зэвсэгтэй харуул, камерын хяналтан дор 24 цагийн  гэрийн хорионд байхыг анхааруулсан байна. Түүнийг  “Rikers Island” шоронд дөрөв хоног хорьсоны дараа ийнхүү батлан даалтад гарахыг зөвшөөрч буй ажээ. Стросс-Каны өмгөөлөгч түүнийг батлан даалтад гаргахын тулд нэг сая ам.долларын барьцаа болон даатгалд таван сая ам.доллар төлсөн гэнэ. Стросс-Кан одоо хүртэл өөрт нь тулгаж буй хүчингийн хэргийг үгүйсгэсээр байгаа юм байна.