Элсэлтийн ерөнхий шалгалт /ЭЕШ/-ын бүртгэл өнгөрсөн дөрөвдүгээр сарын 22-нд, сурагчдын материалын алдааг засах хугацаа энэ сарын 15-нд дууссан. Одоо ЭЕШ-ын бүртгэлд ямар ч засвар, өөрчлөлт орохгүй. Учир материалын засварыг өргөдлийн дагуу хүлээж авах хугацаа хангалттай байсан аж. Энэ жил ерөнхий боловсролын сургуулийг 39 мянган сурагч төгсч, таван мянга гаруй өнгөрсөн оны төгсөгчид ЭЕШ өгнө гэсэн урьдчилсан тоо байсан. Харин энэ жил ЭЕШ-нд 39 мянга гаруй хүүхэд бүртгүүлсэн байна. Гэхдээ энэ бол хэлбэлзэж болох тоо. Бүртгүүлсний дараа зарим нь янз бүрийн шалтгаанаар шалгалтдаа ордоггүй нь бий. Одоогоор сурагчдын шалгалтын хуваарь, анги, суудал хуваарилалтыг хийж байна.  Энэ онд ЕБС төгсч буй шалгуулагчид шалгалт өгөх ЭЕШ-ын байр, анги танхим, суудлын хуваарийг баталгаажуулсан шар өнгийн хуудасыг шалгалт эхлэхээс өмнө харъяа Боловсрол, соёлын газраар дамжуулан авах ёстой. Элсэлтийн ерөнхий шалгалтын бэлтгэл ажлын талаар Боловсролын үнэлгээний төвийн ахлах мэргэжилтэн М.Гантуяагаас тодрууллаа.

-Элсэлтийн шалгалтын бэлт­гэл ажлын явц  хэр байна?

-Сурагчдын элсэлтийн шалгал­тын бүртгэл дуусаад, өргөдлийн дагуу засвар хийсэн. Одоо шалгалтын суудал хуваарилалт, анги, суудал зохицуулах ажил үргэлжилж байна. Мөн манай мэргэжилтнүүд орон нутаг болон дүүргийн сургуулиудаар  явж шалгалтын бэлтгэлийг хийж, сурагчдын материал тулгаж байна. Энэ жил 40 мянга гаруй хүүхдэ бүртгүүлэх байсан ч 39 мянга орчим хүүхэд бүртгүүлсэн.

-Их дээд сургуулийн консер­циумаас тусгай журам гаргадаг. Үүнд өнгөрсөн оны төгсөгчдөд зориулсан тусгай журам бий юу?

-Өнгөрсөн жилийн төгсөгч, энэ жилийнх гэж ялгаа байхгүй. Элсэлтийн ерөнхий шалгалтын бүртгэлд хамрагдсан сурагчид их дээд сургуулийн консерциумаас гаргасан журмын дагуу их, дээд сургуульд элсэх боломжтой. Шинээр элсэгчид 400 дээш 800 хүртэл оноо авна. Тухайн консерциумын журмын дагуу сурагчдын шалгалтанд авсан оноо, гэрчилгээний оноогоор жагсаана. Өмнө жилүүдийн оюутан элсүүлэх журмын дагуу явагдана. Гүйцэтгэлийн хувь (хоёр ерөнхий шалгалтын оноогоор элсэж байгаа бол илүү ач холбогдолтой хичээлийн оноо), ерөнхий боловсролын үнэмлэх эсвэл Дипломын дундаж оноо, ерөнхий шалгалт өгсөн оноо зэргээр жагсааж хуваарь сонгуулна.

-Их дээд сургуулийн үзэсгэлэн яармаг энэ сарын 18-аас эхэлсэн. Хэзээ дуусах вэ?

-Их дээд сургуулийн консер­циумаас зохион байгуулж байгаа их, дээд сургуулийн танилцуулах үзэсгэлэн өмнө нь болж байсан. Энэ удаагийн үзэсгэлэн Хүүхдийн ордонд маргааш /өнөөдөр/ 18.00 цаг хүртэл болно. Ер нь бол сурагчид ЭЕШ-ийн бүртгүүлэхийн өмнө элсэх сургууль,  мэргэжлээр шийдэж, тухайн хичээлээ сонгож бүртгүүлсэн байгаа. Мөн зарим сурагчид гадаадын их дээд сургууль суралцах гэх мэт шалтгаанаар ЭЕШ-нд орохгүй байх тохиолдол байдаг.

-Элсэгчдэд хандаж юуг хамгийн гол нь анхаараасай гэж зөвлөмөөр байна?

-Шалгалт эхлэхэд ганцхан сарын хугацаа үлдсэн учраас элсэгчид хичээлээ сайн бэлтгэ гэмээр байна. Манай төвөөс гаргасан тестийн номыг ашиглаж шалгалтдаа бэлтгэх хэрэгтэй. Учир нь 100 мянган тестээс санамсаргүй тохиолдлоор сонгож шалгалт авах учраас тестэн дээрээ сайн ажилла. Мөн шалгалтын цагаасаа хоцролгүй ирэхийг анхааруулья.