“NTV”, “SBN”,” Боловсрол суваг” телевизийн уран бүтээлчид хамтран зохион байгуулж буй “Авьяаслаг Монголчууд” уралдааны эхний шатны шалгаруулалт энэ сарын 2-6-ны өдөр “АСА” циркт болсон билээ. Уралдааны эхний шатны шалгаруулалтад 600 гаруй оролцогч оролцсон бол энэ сарын 16-нд эхэлсэн хоёрдугаар шатны шалгаруулалтад 132 оролцогч өрсөлдсөнөөс 50 оролцогч шийдвэрлэх гуравдугаар шатанд тунаж үлджээ.  Үзэгчдэд нээлттэй, үнэ төлбөргүй болж байгаа тус уралдаан гурван үе шаттай юм. Уралдааны эцсийн шатны шалгаруулалт ирэх долоо хоногийн даваа гаригаас эхэлнэ.  Эндээс шилдэг 15 оролцогчийг нэрлэж, Монголын хамгийн авьяаслаг хүнийг тодруулах юм. Уралдааны тэргүүн байрт шалгарсан ялагч 30 сая төгрөг гардах ёстой. Энэхүү өндөр шагнал, нэр хүндтэй уралдааны ялагийг Улсын драмын эрдмийн театрын найруулагч Б.Баатар, “Камертон” хамтлагийн ахлагч, дуучин Д.Болд, топ модель Э.Одгэрэл нар шүүн тунгааж байгааг дахин сануулъя.