Холливуудын домогт жүжигчин өдгөө 73 настай Жейн Фонда алдартай загвар өмсөгч Наоми Кемпбеллийн хандивын шоунд оролцон тайзнаа алхаж, залуу, үзэсгэлэнт бүсгүйчүүдээс дутахгүй гэдгээ харуулсан байна. Тэрбээр Каннын олон улсын кино наадмын үеэр зохиогдож буй “Forville Market” шоунд лусын дагиных мэт алтлаг даашинзтай ирсэн нь  олны нүдийг хужирлажээ.

Шоуны дараа домогт жүжигчин загвар өмсөгчидтэй хамт хандивын санд зориулж зургаа авахуулсан байна. Холливуудын жүжигчин, зохиолч, улс төрийн зүтгэлтэн Жейн Фонда 1960-аад оны үед “ Барбарелла” киногоороо алдрын оргилд хүрсэн байна.  Америкийн кино академийн шагнал “Оскар”-ыг хоёр удаа хүртэж байсан домогт жүжигчин 2005 онд “Хуулийн харгислал” кинонд тоглож кино урлагт эргэн ирсэн аж. Вьетнамын дайны эсрэг идэвхитэй тэмцэгч байсан Жейн Фонда Иракийн дайн, эмэгтэйчүүдийн хүчирхийллийн эсрэг хөдөлгөөнд оролцож байжээ. 

Н.Соло