Цэргийн ёсолгооны орчин үеийн уламжлал Их Британийн арлаас уламжлалтай. Дэлхийн олон орнуудад бага тушаалтай цэргийнхэн ахлах тушаалтнууддаа малгайгаа аван мэндчилдэг байжээ. Британийн арми XVIII—XIX зуун хүртэл ингэж мэндчилдэг байв. Гэвч цэргийн малгай, дуулга нүсэр болсон учир зөвхөн гараа саравчиндаа хүргэн мэхийн ёслох болсон байна. Бидний сайн мэдэх малгайндаа гараа хүргэн ёслох мэндчилгээ нь Английн хатан хааны хувийн гвардийн элитийн анги Колдстримын хороонд 1745 оноос үүссэн. Хорооны дүрэмд “Бие бүрэлдэхүүн хажуугаараа өнгөрөх офицерт хандахдаа малгайгаа өргөхгүйгээр гараа малгайдаа хүргэн мэндчилэн бөхийж байхыг тушааж байна” хэмээн бичсэн байдаг. 1762 онд Шотландын гвардийн дүрэмд: “Малгайгаа тайлах нь малгайг муухай болгон харагдуулахаас гадна бүчийг нь хиртүүлдэг. Тийм учраас бие бүрэлдэхүүнд цаашид малгайдаа алгаа  өргөн хүргэж, хажуугаар өнгөрөх офицерүүдтэй мэндэлж байхыг тушааж байна” гэсэн байлаа.

Эхлээд энэ шинэлэг дүрэм эсэргүүцэлтэй тулгарч байсан ч одоо ердийн хэм болон тогтжээ. Малгайдаа гараа хүргэн ёслохдоо цэргийн хүмүүс толгой бөхийлгөлгүйгээр эгц харсан байх ёстой. Энэ нь цэргийн янз бүрийн цолтнууд нэгэн улсдаа зүтгэсэн эрх чөлөөт хүмүүс гэдгийг харуулах ёстой ажээ. Их Британийн цэргийн мэндчилгээ XIX зууны дунд үеэр дахин өөрчлөгдөж, гарын алгаа гадагш харах болсон байв. Харин Америк цэргийнхний мэндчилгээнд Британийн Тэнгисийн цэргийн уламжлал нөлөөлжээ. Дарвуулт хөлөг онгоцтой байсан үед усан цэргийнхэн хөлгийнхөө завсрыг давирхайдан бөглөдөг байсан. Тэд гартаа цагаан бээлий өмсдөг байснаас гадна давирхайд бохирдсон алгаа үзүүлэхгүй гэж алгаа 90 градусаар доош эргүүлэн саравчлан харж байгаа мэтээр ёслох болсон байна. Францын цэргийнхэн ч мөн л ийм маягаар мэндэлдэг. Хаант Оросод хоёр хуруугаа өргөн мэндчилдэг уламжлалтай байсан нь одоо Польшийн цэрэгт хэвээр үлдсэн. Хуучин Зөвлөлт өнөөгийн Орос болон Монголын армид дунд хуруугаа нь чамирхайд хүргэн алгаа бүрэн тэнийлгэж ёслодог.