Улсынхаа шигшээ багийг дасгалжуулан Хар тивд анх удаа болсон дэлхийн аваргад тамирчдаа сойсон Аргентины домогт хөлбөмбөгч Диего Марадона Дубайн “Аль Васл” клубын дасгалжуулагчаар ажиллах саналыг хүлээн авчээ. Хөлбөмбөгийн спортын түүхэнд уран чадварлаг тоглолтоороо Марадона гэх нэрийг тодоор бичүүлсэн тэрбээр өнгөрөгч амралтын өдрүүдийг Арабын нэгдсэн Эмиратад “Аль Васл”-ын удирдлагуудтай ярилцаж, өнгөрүүлсэн гэнэ. Тэрбээр хоёр жилийн хугацаатай гэрээ үзэглэсэн бөгөөд ирэх сараас ажлаа хүлээн авах ажээ.

Марадона тоглогчийн хувиар 91 тоглолтод Аргентины шигшээг төлөөлж, 34 гоол оруулсан. Тэрбээр 1986 онд улсынхаа шигшээ багийг ахлан дэлхийн аваргад түрүүлж байсан билээ. Түүний хөлбөмбөгчийн замнал 21 жил үргэлжилсэн. Энэ хугацаанд тэрбээр Испанид “Барселона” болон “Наполи”-д, мөн Италийн Сери А лигт хүч сорьж байв.