Өнөөгийн техник, технологийг 10 жилийн өмнөхтэй харьцуулахад эрс өөрчлөгджээ. Гэхдээ хүн хөгжихийн хэрээр өөрөө өөртөө хор хохирол учруулсаар байна. Энэ удаад өдөр тутамдаа хэрэглэдэг технологи бидний бие махьбодод ямар хор хохирол учруулдаг болохыг өгүүлье.

Компьютер нүүрэн дээр тоос хуримтлуулдаг
-Чанаргүй дэлгэцэн дээр гарсан дүрс татвалзаж харагддагаас болж нүд ядарч, хуурайшиж загатнан, холын хараа муудаж, толгой өвддөг.
-Компьютерийн өмнө нэг байрлалаар сууснаас болж хүзүү, мөр, нурууны булчин ачаална.
-Дэлгэцийн эргэн тойронд цахилгаан соронзон орон зай үүсдэг бөгөөд энэ нь агаарт байгаа тоос шороог нүүр, гаран дээр хуримтлуулдаг байна. Үүнээс болж бидний арьс маш их бохирддог.

Урьдчилан сэргийлэх арга:
Компьютерээ хананаас 50 см-ээс доошгүй зайд байрлуул. Өрөөгөө салхилуулж, өдөр бүр чийгтэй цэвэрлэгээ хийх хэрэгтэй. Ажлын дараа нүүрээ хүйтэн усаар угааж занш. Мөн компьютер дээр ажиллахдаа заавал завсарлага авч байгаарай. Насанд хүрэгчид хоёр цаг тутамд, харин хүүхдүүд 30 минут тутамд 15 минут завсарлах хэрэгтэй.

Гар утас хөгшрүүлдэг
-10 гаруй жил утас барьсан хүний тархинд хорт бодис нэвтэрсэн эсэхийг хянадаг эс нь хэврэг болдгийг судалгаагаар нотолжээ. Үүнээс болж Альцгеймер, Паркинсоны өвчин, сонсголын мэдрэл алдагдах зэрэг эрсдэлд ордог ажээ.
-Гар утаснаас гарах туяа нь ой ухааныг муудуулж, даралт ихэсгэн, бие махьбодыг хөгшрүүлдэг байна. Үүнээс гадна эрчүүдийн үрийн шингэний чанарыг алдагдуулдаг.

Урьдчилан сэргийлэх арга:
Боломжтой бол зөвхөн суурин утас хэрэглэ. Гар утсаа өмднийхөө халаасанд хийж авч явах хэрэггүй.

Чихэвчний хөгжим дүлийрүүлдэг
-Жижиг чихэвч чихний дотор орж, сонсголын эрхтнүүдтэй нягт холбогддог. Шуугиантай орчинд хүмүүс плэйрийн дуугаа чангатгаснаас бол чихэндээ улам даралт учруулдаг байна. Чихэвчний хөгжмийг гурван цагийн турш сонсоход 10 жилийн дараа сонсгол 30 хувиар муудах болно.
-Чихэвчний хөгжим сонссоноор хайнга болж, аваарт илүү өртдөг.
Урьдчилан сэргийлэх арга:
Чихэвчний хөгжмийг шуугиан ихтэй газар сонсох хэрэггүй. Мөн том чихэвч хэрэглэвэл аюулгүй. Харин гэртээ хөгжмөө чихэвчгүйгээр сонсоорой.