Монгол Улсын Ерөнхийлөгч энэ сарын сүүлчээр ОХУ-д албан ёсны айлчлал хийхээр болсон. Айлчлалыг өнгөрсөн онд хийхээр төлөвлөж байсан ч тодорхойгүй шалтгаанаар хойшилсоор өдийг хүрсэн билээ. Ерөнхийлөгчийн айлчлалын үеэр манай улс ОХУ-тай хэд, хэдэн чухал сэдвээр хэлэлцээр хийнэ. Тодруулбал, “Дорнод Уран” компани байгуулах болон “Улаанбаатар төмөр зам” хувь нийлүүлсэн нийгэм­лэгийн гэрээнд өөрчлөлт оруу­лах зэрэг асуудлаар хэлэлцээр хийхээр төлөвлөж буй ажээ. Ямартай ч одоо эдгээрийг Монголын талд ашигтайгаар шийдвэрлүүлнэ гэсэн хүлээлт бий болчихоод байна  Түүнчлэн айлчлалын үеэр газрын тосны бүтээгдэхүүний нийлүүлэлт, экспортын татварыг бууруулах чиглэлээр яриа, хэлэлцээр өрнүүлэх ажээ.

Манай тал ОХУ-ын нутаг дэвсгэрээр дамжин өнгөрөх Монголын ачаа тээвэрлэлтэд тарифын урт хугацааны хөнгөлөлт үзүүлэх, “Улаанбаатар төмөр зам”-д бүтцийн шинэчлэлт хийх, дүрмийн санг нь 250 сая ам.доллараар нэмэгдүүлэх саналтай байгаагаа Монгол, Оросын Засгийн газар хоорондын комиссын ээлжит хуралдааны үеэр илэрхийлж байсан. ОХУ-ын Засгийн газраас “Энэ асуудлыг хэлэлцэж, шийдвэрлэнэ” гэсэн хариуг өгсөн. Тиймээс Ерөн­хийлөгчийн айлчлалын үеэр энэ асуудлыг нааштайгаар шийдэж магадгүй аж.
Зам, тээвэр, барилга, хот байгуулалтын яамны Зам, тээврийн бодлогын газрын дарга Б.Махбалаас дараах асуултад хариулт авлаа.

-Монгол Улсын Ерөнхий­лөгчийн ОХУ-д хийх айлчлалын үеэр төмөр замын гэрээг шинэчлэх асуудлыг хэлэлцэнэ хэмээж байна. Салбарын яаманд энэ талаар төлөвлөсөн зүйл бий юү?

-“Улаанбаатар төмөр зам” хувь нийлүүлсэн нийгэмлэг байгуулах тухай хоёр орны Засгийн газар хоорондын гэрээнд өөрчлөлт оруулах асуудлыг Монгол Улсын Ерөн­хийлөгчийн айлчлалын үеэр хэлэл­­цэхээр төлөвлөж байгаа. Ямар­тай ч гэрээний  төслийг боловс­­руулсан. Зас­гийн газраар хэлэл­цүүлж, баталсан.

-Гэрээнд чухам ямар өөрчлөлт оруулахаар төлөвлөж байгаа тухайгаа тодруулна уу?

-Энэ талаар одоо хэлэх боломжгүй. Учир нь ОХУ-ын талаас гарын үсэг зурах эсэх нь тодорхойгүй байна. Тэд одоогийн нөлөөллөө алдахгүйг эрмэлзэх нь дамжиггүй.

-Хэрвээ гэрээг шинэчлэх шийдвэрт хүрч чадвал Монголын төмөр замд ямар өөрчлөлт гарах бол?

-Монгол Улс бол тусгаар тогтносон улс. Төмөр замын салбар алийн болгон ингэж явах вэ. Хэрвээ ОХУ-ын талаас гэрээнд гарын үсэг зурчихвал үр дүн нь аяндаа мэдрэгдэх болно.