Төрийн өмчийн хороо Могойн голын дулааны цахилгаан станцыг барих, ашиглах, шилжүүлэх онцгой эрх олгох концессын гэрээг “Шинэ Азиа Майнинг групп”-тэй байгуулжээ. Гэрээнд ТӨХ-ны дарга Д.Сугар, “Шинэ Азиа Майнинг групп”-ын захирал Л.Төрбаяр нар гарын үсэг зурж, баталгаажуулах ёслолын ажиллагаа өнгөрсөн долоо хоногт болов. Могойн голын дулааны цахилгаан станц барих концессын гэрээ нь Концессын тухай хуулийн дагуу хийгдэж байгаа анхны концессын гэрээ бөгөөд концессын барих- ашиглах- шилжүүлэх төрлөөр, станцыг барьж байгуулахад хоёр жил, ашиглаж, үйл ажиллагаа явуулахад 20 жил нийт 22 жилийн хугацаатай байх ажээ. Гэрээний хугацаа дуусахад дулааны цахилгаан станцыг төрийн өмчид үнэ төлбөргүйгээр шилжүүлэх ба энэ хугацаанд улсын төсвөөс ямар нэгэн санхүүгийн дэмжлэг, баталгаа гаргахгүй юм байна. Харин концесс эзэмшигчээс нийт 110 сая ам.долларын хөрөнгө оруулалт шаардагдах бөгөөд ашиглалт, үйл ажиллагаанаас гарах эрсдлийг концесс эзэмшигч өөрөө бүрэн хариуцах гэнэ.

Станц ашиглалтад орсноор Завхан болон Говь-Алтай аймгийн хэрэлэгчид цахилгаан эрчим хүчний найдвартай эх үүсвэртэй болно. Өмнө нь дээрх аймгийн иргэд дизель түлшээр ажилладаг эрчим хүчний станцтай байсан юм. Ийнхүү концессын гэрээгээр дулааны цахилгаан станц барьснаар нутгийн иргэд найдвартай эх үүсвэртэй болохоос гадна төсвийн  зардлыг багасгана. Тус дизель станцыг ажиллуулахын тулд жилд 13 орчим тэрбум төгрөгийн татаасыг улсын төсвөөс олгодог байсныг хэмнэж байгаа юм байна.

Дулааны цахилгаан станцыг Завхан аймгийн Тэлмэн сумын нутагт барина. Нүүрсээ Могойн голын нүүрсний уурхайгаас тухайн жилийн зах зээлийн үнээр худалдан авч, үйлдвэрлэсэн эрчим хүчээ Эрчим хүчний тухай хуульд заасны дагуу зохицуулалттай үнээр эцсийн хэрэглэгчдэд хүргэх юм. Энэхүү концессын гэрээний дагуу дулааны цахилгаан станцыг барьж ашиглалтад оруулснаар 300 орчим ажлын байр шинээр бий болох урьдчилсан тооцоо байна. Станцыг барьснаар уурхайн олборлолт ч мөн нэмэгдэж, түүнийг дагасан бусад орлого сайжирна. Могойн голын нүүрсний уурхайн борлуулалт жилд 15,000 тн байсан бол 200,000 тн болж нэмэгдэх ажээ.