Монголын боксын үндэсний шигшээ багийн тамирчид Казахстан улсын нийслэл Алмата хотноо "Казахстаны ерөнхийлөгчийн цом" Олон улсын "А" зэрэглэлийн тэмцээнд өрсөлдөж байна. Тэмцээн долдугаар сарын 8-13-ны өдрүүдэд үргэлжлэх юм.

"Казахстаны ерөнхийлөгчийн цом"-д ОХУ, Куба, Украин, Казах зэрэг энэ цагийн боксын өнгийг дэлхийд тодорхойлж байгаа 10 гаруй орны тамирчид оролцож байгаагийн дотор олимп, дэлхийн аварга болон медальтай 18 боксчин хүч үзэж байна.

Олимпийн аварга Э.Бадар-Ууганаар ахлуулсан Монголын шигшээ багийн дасгалжуулагчаар Ардын багш Д.Банди /Зөвлөх багш/, Үндэсний шигшээ багийн ахлах дасгалжуулагч  Д.Батсүрэн, шигшээ багийн дасгалжуулагч Б.Эрдэнэбаяр нар ажиллаж байгаа бол Шигшээ багийн тамирчид болох Г.Ган-Эрдэнэ /49 кг/, А.Нурлан /52 кг/, Н.Төгсцогт /56 кг/, Д.Отгондалай /60 кг/, Б.Чинзориг /64 кг/, Б.Түвшинбат /69 кг/, Ж.Отгонжаргал /75 кг/, С.Эрдэнэбаяр /81 кг/, Т.Ерболат /91 кг/ нар цомын тэмцээнд өрсөлдөж байна.

Эхний өдрийн тоглолтод Монгол Улсын Гавьяат тамирчин Н.Төгсцогт Тажикстаны Авзалшоевийг оноогоор яллаа. Түүнчлэн ОУХМ Д.Отгондалай, Б.Чинзориг, Ж.Отгонжаргал нар мөн эхний өрсөлдөгчөө оноогоор ялаад байна.

Б.ЭНХ