Японы эдийн засагчид иргэдийн худалдан авах чадвар цаашид буурна гэж таамаглаж байна.  Хэдийгээр газар хөдлөлтийн гамшгийн дараа иргэдийн худалдан авалт буурсан ч энэ сарын эхээр болсон “Алтан долоо хоног” баярын өдрүүдэд сэргэх хандлага гарсан ажээ. Өнгөрсөн гуравдугаар сард Японы гол индекс 40.6-38.3 хүртэл буурсан нь сүүлийн 13 сарын хамгийн доод төвшин байсан юм. Японы эдийн засагчдын үзэж буйгаар гамшгийн бүсээс хол байсан Токио болон бусад мужийн иргэд зардлаа багасгаж эхэлсэн нь худалдан авалтын хэмжээг бууруулсан ажээ. Японы ард иргэд гамшигт нэрвэгдсэн иргэдийн төлөө идэж, уух болон зугаа цэнгэлд зарцуулах мөнгөө багасгасан байна.

Харин Японы “Алтан долоо хоног” амралтын өдрүүдэд худалдан авах чадвар дахин нэмэгдсэн байна. Түүнээс гадна иргэдийн худалдан авалтад нөлөөлж буй өөр нэг хүчин зүйл нь нас барагсдын найз нөхөд, гэр бүлийнхэнд 49 хоног өнгөртөл зугаа цэнгэл, найр наадмыг хориглодог Буддын ёс заншил ажээ.

Японд эрчим хүчний хэрэглээ оргил үедээ хүрдэг зуны улиралд албан байгууллагуудын эрчим хүчний хангамжийг 15 хувиар бууруулах шийдвэр гаргасан байна. Токиогийн эрчим хүчний компани ирэх нэгдүгээр сар гэхэд цөмийн реакторуудыг бүрэн хяналтандаа авна гэж мэдэгдсэн байна. Хэрэв Засгийн газар цөмийн алдагдлыг аль болох ойрын хугацаанд арилгаж чадахгүй бол ард иргэдийн хандлага өөрчлөгдөнө гэж ажиглагчид үзэж байгаа юм.