Засгийн газрын харьяа 11-11 төвд ирүүлсэн иргэдийн санал гомдлыг түүвэрлэвэл, “Буянт-Ухаа-1” орон сууцны хороололд захиалга өгсөн иргэд хэзээ байрандаа орох, жилийн найман хувийн хүүтэй орон сууцны зээлийг хэзээнээс олгож эхлэхэд тодорхой хариулт өгөхийг хүсчээ. Мөн зарим зам компанийн ажилчид замаа засахгүй ажил алдаж байгааг анхааралдаа авахыг хүссэн байна. Энэ талаарх дэлгэрэнгүй мэдээллийг хүргэе.

№1407043553 “Буянт-Ухаа-1” хороололд байр авах гээд хувиа бүрдүүлээд өгчихсөн. Банкуудтай тохиролцоо хийсэн гэж байгаа хирнээ Голомт банк зээл олгохгүй судлахгүй гэсэн тайлбар өгөөд байна.

№1407041819 “Голден парк” байнга хогоо шатаадаг. 2014.07.3 шөнө шатаасан хогноос нь болж урьд шөнө угаартаж үхэх дөхлөө. Шөнө унтахад утаа үнэртээд байхаар нь гарч хараад хог шатаж байхаар нь өмнөх шигээ л ингэсгээд унтрах байх гэж бодоод унтаад гэтэл нэг мэдсэн бие сонин болоод сэрсэн чинь гэрээр дүүрэн  утаа… арга хэмжээ авч өгнө үү.

№1407041622 БГД 1-р хороо "Хос өргөө" хотхоны дэргэд хувь хүмүүс зөвшөөрөлгүй цагаан идээ, хүнсний ногоо худалдаалж байна. Иргэдийн амгалан тайван байдлыг алдагдуулж, хүүхдүүд тоглох талбайг эзэмшээд, худалдаалж буй бүтээгдэхүүнүүд нь муудсан гэх мэт эрүүл ахуйн шаардлага зөрчсөн орчинд худалдаа явуулж байна. Шалгаж, арга хэмжээ авна уу?

№1407044275 БГД-ийн 16-р хорооны ажилчид маш хүнд сурталтай ажиллаж байна. Шилжүүлэг хийлгэх гэж 14 хоног явж байна, арай хэтэрхий байна. Хорооны ажилчдын мэдлэг чадварыг сайжруулах хэрэгтэй байна.

№1407042613 Сая чуулганаар Монгол бөхийн далай аврага цол байхгүй болсон талаар энэ хуулийг хориг тавьж өгнө үү гэж Ерөнхийлөгчөөс хүсч байна. Нэг л хүнд зориулсан хуль байна.

№1407046158 СХД-ийн Драгонаас дээшээ явах замд явган хүний зам тавьж байгаа юм байна. Энэ хүмүүс ажлаа хийхгүй архи уугаад суугаад байх юм. Ажил явагдахгүй 14 хоног болж байна. Үүнд хяналт тавьж арга хэмжээ авч өгнө үү.

№1407049962 "Буянт Ухаа-1" хорооллоос орон сууц худалдан авахдаа 100% төлөлт хийсэн. Хэзээнээс байр ашиглалтанд орох вэ? Энэ талаар мэдээлэл өгнө үү. 100% төлбөрөө хийсэн иргэдийг шууд байранд оруулах талаар арга хэмжээ авч өгнө үү.

№1407049814 "Буянт Ухаа- 1" хорооллын зээл хэзээнээс олгогдох вэ? Засгийн газар болон Монгол банкууд яагаад шийдвэрээ гаргахгүй удаж, иргэдийг чирэгдүүлж байна вэ? Яаралтай арга хэмжээ авна уу.

№1407048661 Замын-Үүдээс ачаа авах гээд 2 хонож байна. Төмөр зам сэлгээгээ ч хийхгүй байна. Энэ асуудал дээр анхаар ч өгнө үү гэжээ.

Г.НАРАН