Япон улсад өнгөрсөн гуравдугаар сарын 11-нд нүүрлэсэн газар хөдлөлт, цунамийн  улмаас Фүкүшимагийн атомын цахилгаан станцад томоохон хэмжээний гэмтэл гарсан. Станцын хөргүүрийн системүүд эвдэрч, реакторуудын агуулахууд дэлбэрэх магадлалтай байгаа энэ үед Японы инженерүүд нэгдүгээр реакторын корпусыг усаар дүүргэж хөргөх арга хэмжээ авахаар зэхэж байсан юм.

Гэсэн ч цөмийн түлшний савханцар хайлснаас 3,000 тонн бохир ус реакторын агуулахад нэвчсэн учир инженерүүдийн боловсруулсан төлөвлөгөө талаар болжээ. Фукушимагийн атомын станцын оператор Токиогийн цахилгаан эрчим хүчний компани (ТЕПКО)-ийн тайлбарласнаар реакторуудыг бүрэн хөргөтөл цаг их шаардагдах тул өөр арга хайж олох хэрэгтэй гээд  цөмийн тогоонуудыг аюулгүй болгох шинэ төлөвлөгөөг тавдугаар сарын 17-ны өдөр гэхэд бэлэн болгоно гэж мэдэгдсэн байна .