Өнгөрсөн
баасан гаригт Хаан банкны салбаруудын үүдэнд эх орны хувь хишиг 21 000
төгрөгийг олгох ажил түр хугацаанд саатах тухай зарлал хадсан байлаа.
Энэ нь Засгийн газраас гаргасан тогтоол болон Хөдөлмөр халамж,
үйлчилгээний газартай байгуулаагүй байгаа гэрээтэй холбоотой хэмээн
зарлалд тайлбарласан байв. Мөн зарлалд “Түр” гэсэн тодорхойгүй
хугацаагаар “Эх орны хувь хишиг” үйлчилгээг үзүүлэхгүй болохыг мэдэгдье
гэсэн байна.

Засгийн газраас иргэддээ тарааж буй дээрх мөнгийг Хаан, Хадгаламж болон
Капитал банкаар дамжуулан олгож байгаа. Сар бүрийн 15-наас хойш
санхүүжилт хийгддэг тул үүнээс авахуулаад дээрх банкуудын ачаалал эрс
нэмэгддэг. Үүнд банкууд ч, иргэд ч бухимдалтай байх нь бий. Тиймээс
Засгийн газар банкуудад үүсч буй ачааллыг бууруулах зорилгоор бусад
арилжааны банкинд тус үйлчилгээг шилжүүлэх тогтоол гаргасан гэнэ.