Австралид суугаа манай ЭСЯ тус улсын Куинсланд мужийн Худалдаа, хөрөнгө оруулалтын газартай хамтран “Монгол Улсад бизнес эрхлэх нь” сэдэвт чуулга уулзалтыг  энэ  тавдугаар сарын 5-ны өдөр Куинсландын нийслэл Брисбан хотноо зохион байгуулжээ.

Чуулга уулзалтад Элчин сайд Ц.Жамбалдорж, Куинсландын Засгийн газрын Хятад, Монголыг хариуцсан худалдааны тусгай төлөөлөгч Стив Брэдхауэр, Худалдаа, хөрөнгө оруулалтын газрын ерөнхий менежер Роб Видсон, Австралийн Гадаад худалдааны агентлагийн Монгол Улсад суух төлөөлөгч Дэвид Лаусон, манайд Худалдааны төлөөлөгчөөр ажиллаж байсан Род Комерфорд, Австралийн “Сэджмэн” компанийн Ерөнхий захирал Питер Лонг, Жэй-Ти-Эй Интэрнэйшнл компанийн Гүйцэтгэх захирал др. Жэйн Томасон нарын Куинсланд мужийн манайтай хамтран ажиллах сонирхол бүхий пүүс, компаниудын төлөөлөгчид нийт 100 орчим хүн хүрэлцэн иржээ.  Мөн манай UFC группын Ерөнхий захирал О.Амартүвшин, дэд захирал Б.Болорчулуун, Куинсланд дахь Монголчуудын Холбооны тэргүүн Ё.Гантулга нарын төлөөлөгчид оролцов. Куинсландын Засгийн газрын Хятад, Монголыг хариуцсан  худалдааны тусгай төлөөлөгч Стив Брэдхауэр уулзалтыг нээж хэлсэн үгэндээ байгалийн арвин нөөц баялагтай Монгол Улстай хамтран ажиллах сонирхолтойгоо илэрхийлж, энэ чиглэлээрх үйл ажиллагаа сүүлийн жилүүдэд идэвхжиж байгааг тэмдэглэв.

Элчин сайд Ц.Жамбалдорж “Монгол Улс дахь бизнес, хөрөнгө оруулалтын боломж” сэдвээр дэлгэрэнгүй илтгэл тавьж, хүмүүсийн сонирхсон асуултад тодорхой хариулт өгөв. Түүнчлэн манай улсад 2010 онд Худалдааны төлөөлөгчөөр ажиллаж байсан Австралийн Гадаад худалдааны агентлагийн ахлах зөвлөх Род Комерфорд, “Сэджмэн” компанийн Ерөнхий захирал Питер Лонг, “Жэй-Ти-Эй Интэрнэйшнл” компанийн Гүйцэтгэх захирал др. Жэйн Томасон нар Австрали, Монголын эрдэс баялаг, уул уурхайн салбарын хамтын ажиллагаа, Монголд явуулж буй өөрсдийн үйл ажиллагааны талаар танилцуулав. Мөн УМХГ-ын Геологи, уул уурхайн хяналтын хэлтсийн дарга Б.Баатарцогт байгууллагынхаа үйл ажиллагаа, байгаль орчныг хамгаалах, нөхөн сэргээлтийн талаар ярьж танилцуулав. Австралийн төлөөлөгчид манай улстай уул уурхай, дэд бүтэц, боловсрол, эрүүл мэндийн салбарт түлхүү хамтран ажиллах сонирхолтойгоо илэрхийлж байв.