ДОХ-ын улмаас нас барагсдын дурсгалыг хүндэтгэх олон улсын өдрийг тохиолдуулан ХДХВ ба ДОХ-оос урьдчилан сэргийлэх чиглэлээр үйл ажиллагаа явуулдаг төрийн болон төрийн бус байгууллагуудын зүгээс “Амьдад нь хайрлая-амьдрахад нь тусалъя” сэдэвт гэрэлт зул өргөх ёслолыг энэ сарын 15-нд 19.00 цагаас Бурхан багшийн цэцэрлэгт хүрээлэнд зохион байгуулахаар болжээ.

Зорилго нь ДОХ-ын улмаас нас барагсдыг эргэн дурсаж, халдвартай хүмүүс, тэдний хайртай, ойр дотны хүмүүсийг үл ялгаварлан гадуурхах үзэл хандлага бүхий дэлхий нийтийн арга хэмжээнд монголчууд чин сэтгэлээсээ нэгдэж, кампанит арга хэмжээ болгон зохион байгуулж, олон нийтийг уг өвчний аюулаас сэргийлэхэд чиглэсэн сурталчилгаа өрнүүлэхэд чиглэж байгаа  аж.

Гэрэлт ёслолын үеэр бурхан болоочид, болон тэдний ойр дотны хүмүүст хандан чин сэтгэлийн үгээ хэлж, ХДХВ ба ДОХ-ын асуудалд үнэн бодитой, ялгаварлан гадуурхахгүй, бие биендээ тусалж дэмжсэн үүднээс хандаж байхыг уриалах бөгөөд бурхан болоочдын дурсгалд зориулж мод тарих юм. Түүнчлэн ёслолд оролцохоор ирсэн хүмүүст зориулж ХДХВ ба ДОХ-оос урьдчилан сэргийлэх талаар төрөл бүрийн мэдээ, мэдээлэл түгээж, хамтлаг дуучдын бүтээлүүдээс сонирхуулахын зэрэгцээ, сүм хийдийн лам нар буяны ном уншиж, оролцогчид гэрэлт дэнлүү өргөх гэнэ.

Гэрэлт дэнлүү өргөх ёслолыг Монголын Улзаан загалмайн нийгэмлэг, Мари стопс, ДОХ-той тэмцэх Үндэсний сан, Монголын гэр бүлийн сайн сайхны нийгэмлэг зэрэг байгууллагууд ивээн тэтгэж, Хүний хөгжил, нөхөн үржихүйн эрүүл мэнд эрх төрийн бус байгууллагаас зохион байгуулахаар болжээ.