"Франын нээлттэй тэмцээн" өндөрлөснөөр зүлгэн дээрх тэмцээнүүд эхлээд байна.

ATP World Tour 250 ангилалд багтах "Gerry Weber Open" тэмцээн Германы Халле хотын "Gerry Weber Stadium"-нд үргэлжилж байна.

711 мянган ам.долларын шагналын сантай тус тэмцээний хоёрдугаар тойрогт Германы Дастин Браун дэлхийн тэргүүн теннисчин Испаний Рафаэль Надалийг хожсоноор шөвгийн наймд шалгарлаа. "Их дуулга"-ын 14 дэх түрүүгээ Парисийн тэмцээнээс хүртээд байсан шороон талбайн "хаан" Рафаэль Надаль шөвгийн 16-д Германы Дастин Браунд 4-6, 1-6-аар ялагдал хүлээснээр тэмцээнийг орхилоо. Дэлхийн тэргүүн теннисчнийг буулган авсан Дастин Браун нутгийн теннисчин Филипп Кольшрейбертэй хагас шигшээд өрсөлдөх эрхийн төлөө тоглоно.

Өдгөө 29 настай Дастин Браун Ямайк эцэг, Герман ээжтэй бөгөөд тэрээр Германд төрж өсчээ.

711 мянган ам.долларын шагналын сантай "Gerry Weber Open" тэмцээний шөвгийн наймд Японы Кей Нишикори, Тайваны Лю Юн Шин нар шалгараад байна. Тэмцээнд дөрөвт эрэмбэлэгдэн тоглож буй Кей Нишикори АНУ-ын Стив Жонсонтой оноолт таарчээ. Харин Тайваны теннисчин тус тэмцээний өнгөрсөн жилийн аварга, "Их дуулга"-ын 17 түрүүт Швейцарийн Рожер Федерертэй 1/4-т өрсөлдөх эрхийн төлөө тоглоно. Тэмцээн ирэх ням гаригт буюу зургаадугаар сарын 15-нд өндөрлөнө.

Ч.БОЛ