Улаанбаатар хотод үйлдвэрлэлийн дадлага хийхээр Дорнод аймгаас ирсэн 10 оюутныг барьцаалж, хүний амь бүрэлгэсэн хэрэг “Цэцэрлэгжилт” компанийн харьяа Мод үржүүлгийн газарт өнгөрсөн лхагва гаригт шилжих шөнө /V.07/ гарсан билээ. Хэргийн талаар тус компанийн захирал Ө.Магсаржавтай утсаар холбогдож, зарим зүйлийг тодрууллаа.

-Оюутнууд одоо хаана байрлаж байгаа вэ. Хариуцаж явсан багштай нь холбогдож болох уу?

-Оюутнууд өнөөдөр Дорнод аймаг руу буцсан. Тэдгээр хүүхдүүдтэй холбоотой хэрэг биш учраас холбогдох боломжгүй.

– Хүүхдүүдэд их хүнд цохилт болсон байх. Байрлуулж байсан байшин нь нэлээд хэцүүхэн газар байсан. Яагаад хүүхдүүдийг ажилчидтайгаа цуг байрлуулж байсан юм бэ?

-Дорнод аймгаас Мод үржүүлгийн газарт бид сүүлийн дөрвөн жил дараалан хүүхдүүд авчирч, дадлагажуулан ажиллуулж байсан. Тэд бүгд мэргэжлийн ангийн оюутнууд байдаг. Бусад мэдээллийг цагдаагийн байгууллага өгөх байх.

-Талийгаач мөн Дорнод аймгийн харьяат гэсэн. Ар гэрийнхнээс нь хүмүүс ирж та бүхэнтэй уулзсан уу?

-Ар гэрийнхнээс нь хүмүүс ирж уулзсан. Надад ч гэсэн хүнд байна.

Д.БҮҮВЭЙ