Дорноговь аймгийн засаг дарга П.Ганхуяг “1000 тэмээний аж ахуй" байгуулсан талаараа Ерөнхий сайдад танилцууллаа. Дорноговь аймгийн төвөөс 35 км, Сайхандулаан сумын нутаг Ганц модны хөндийд “1000 тэмээний аж ахуй” тай болох ажлыг эхлүүлээд байгаа. “Хутагтийн нутгийн тэмээчид “хоршооны ингэний фермийн зориулалтаар инженерийн хийцтэй худаг, уст цэг, цахилгааны агаарын дамжуулах шугамыг орон нутгийн төсвөөс байгуулсан. 2013 онд хоршооны гишүүн 6 айл бууж 450 тэмээтэйгээр үйл ажиллагаагаа эхлүүлээд байгаа, цаашид энэ хөндийд 1000 тэмээ бэлчсэн тэмээний бүс нутаг болохын зэрэгцээ ингэний фермийн сүү боловсруулах үйлдвэр байгуулж, тэмээн поло, тэмээн жин, ингэний сүүний сувилал зэрэг үйл ажиллагаа зохион байгуулагдаж өргөжих юм. Ерөнхий сайд энэхүү ажлын явцтай танилцах үеэрээ хүндрэл бэрхшээлтэй асуудал юу байгаа талаар асууж тодруулан дэмжих талаар ярилцлаа гэж Засгийн газрын Хэвлэл, мэдээлэл, олон нийтийн харилцах албанаас мэдээлэв.