УИХ-ын Төсвийн байнгын хорооны хуралдаанаар Засгийн газрын үнэт цаас гаргахыг зөвшөөрөх тухай УИХ-ын тогтоолын төслийг хэлэлцээд олонхийн саналаар “Хэлэлцэх нь зүйтэй” хэмээн үзлээ. Тогтоолд Монгол Улсын 2011 оны төсвийн алдагдлыг нөхөхөд зориулж 55.5 тэрбум төгрөгийн бонд, төрийн албан хаагчид болон иргэдийг урт хугацаат орон сууцны зээлд хамруулах зорилгоор 72 тэрбум төгрөгийн бонд гаргахаар тусгаад байгаа юм. Хэлэлцүүлгийн шатанд гишүүд улсын нэгдсэн төсвийн алдагдлыг нөхөх зориулалтаар гаргах бондыг дэмжих нь зүйтэй хэмээн үзсэн бол орон сууцны зориулалтаар гаргах бондод шүүмжлэлтэй хандлаа.

УИХ-ын гишүүн Ц.Сэдванчигийн хувьд өнгөрсөн хугацаанд Засгийн газраас төрийн албан хаагчдыг орон сууцжуулах хүрээнд бонд гаргаж, барилгын салбарыг дэмжсэн ч энэ нь эргээд үнийн хөөрөгдөл дагуулах болсныг санууллаа. Барилгын компаниуд орон сууцныхаа үнийг зах зээлийн үнээс хэт дээгүүр үнэлдэг, хэдийгээр төрийн албан хаагчдыг орон сууцтай болоход нь Засгийн газраас барьж буй бодлого дэмжлэг болж буй ч цаана нь байр сууцтай болох гэсэн олон иргэнд боломж олгохгүй үнийн дарамтад оруулж байгаа нь цаашид анхаарах асуудлын нэг болж байна гэдгийг сануулсан юм.

Байнгын хорооны хурал үргэлжилж байгаа бөгөөд Монгол Улсын Засгийн газар, Азийн хөгжлийн банк хооронд байгуулах “Дээд боловсролын шинэчлэл төсөл”-ийн зээлийн хэлэлцээрийн төслийн зөвшилцөх эсэхийг шийдвэрлэхээр төслийг хэлэлцэж байна.