Болгарын нийслэл Софи хотод сонирхогчдын боксын залуучуудын дэлхийн аварга шалгаруулах тэмцээн үргэлжилж байна.

18 дахь удаагийн тэмцээнд 105 орны 606 тамирчин эрэгтэйчүүдийн 10, эмэгтэйчүүдийн гурван жинд өрсөлдөж байгаа юм. Манай улсаас уг тэмцээнд есөн тамирчин хүч үзэж байна. Эхний өдөр 49 кг-ын жинд Б.Төмөрхуяг, 52 кг-д Г.Баттамир нар өрсөлдөгчөө буулган авсан. Б.Төмөрхуягийн хувьд “Барселона” клубт хичээллэдэг бөгөөд эхний тойрогт ӨАБНУ-ын Эдвин Цхабалалаг 3:0-ээр буулган авчээ. Түүний дараагийн өрсөлдөгч нь Данийн боксчин Махмуд Жабор юм. 49 кг-ын жинд 45 боксчин байгаа аж. 52 кг-д өрсөлдсөн Г.Баттамир 2014 оны Азийн аваргын мөнгөн медальт Солонгосын Хан Юун-Хуныг 3:0-ээр ялснаар 1/16 шигшээд үлдэв. Манай тамирчны ээлжит өрсөлдөгч нь Афганистаны Насим Садик байх болно. Тэгвэл тэмцээний хоёр дахь өдөр 60 кг-ын жинд Д.Төрмандах Владислав Варышникийг 2:0-ээр хожлоо. Гуравдугаар үед Германы тамирчин гэмтэж, тэмцээнийг орхисон байна. Харин медаль авах магадлал өндөртэй байсан олон улсын хэмжээний мастер Э.Цэндбаатар 52 кг-д Пуэрто Рика улсын Хенри Лебронд 2:1-ээр дийлджээ. Ингэснээр манай тамирчдаас хамгийн түрүүнд үзэгчдийн суудалд шилжив. Өчигдөр дугаар шилжих мөчид манай улсаас хоёр тамирчин рингэнд гарсан юм.