XX зууны эхний хагаст Мон­голчуудыг Манжийн дарлалаас гар­гахын төлөө цогтой тэмцэж, олон мянган хүнийг манлайлж яв­сан цорж хэргэмтэй Хасбаатар гэж хүн байсан талаар түүхэнд тэмдэглээстэй байдаг. Тэгвэл XXI зууны Монгол Улсад бас нэгэн пар­тизан төрж байна. Түүнийг бас Т.Хас­баатар гэдэг. Түүхэнд нэрээ мөн­хөлсөн Хасбаатараас тэр олон зүйлээрээ ялгаатай. Энх цагт эл­дэв дарамтгүй амьдарч байгаа хэр­нээ ард түмний нэрийг барьж эрх баригчдыг шан­таажилж байгаа нь түүний имиж. Морин хуур тоглоод Японд амьдарч байсан тэрбээр Монголд ирж улстөрч болох гээд байгаагийн цаад зорилго нь албан тушаал, эрх мэдэл ч байж болох  юм. Тэр уг нь Ардчилсан намын гишүүн. Гэтэл намынхаа даргыг огцруулна гээд хэсэг гүйсэн. Тэгснээ нэг л өдөр 180 хэм эргэчихсэн намын дарга Н.Алтанхуягтаа улаан сарнай бэлэглээд зогсч байв. Хүүхдээс “Аавдаа хайртай юу” гээд асуухаар “Хайртай” гэдэг. Жаахан байзнаад “Аавдаа хайргүй тийм ээ” гэвэл “Тийм ээ” гээд л сууж байдаг. Гурван настай жаахан хүүхэд, Т.Хасбаатар хоёр иймэрхүү адилхан түвшинд л харагдаад байгаа юм даа. Тэр өчигдөр хэвлэлийн ху­рал зарлаад Ерөнхий сайд С.Бат­болдыг огцор хэмээн шаардсан бай­на. Яг л Н.Алтанхуягийг огцор гэж хэлж байсан шиг ээ. Сонин байгаа биз. Тэр ам л нээвэл “Огцор” гэж дуугардаг болжээ. Ер нь тоть л нэг үгээ олон давтдаг шүү дээ. Тэр яг тоть шиг харагдаж байна. Түүний энэ зан Японд байхад нь бүрэлдэж буй болсон байх магадлалтай. Учир нь Японы Засгийн газрын сайдууд жаахан л асуудал үүсвэл огцроод байдаг шүү дээ. Тэр Монголыг Японтой харьцуулаад байдаг юм биш байгаа даа. Уучлаарай энэ бол Монгол Улс, Т.Хасбаатар аа.

Зохиогчийн эрх:
"Улс төрийн тойм" сонин