Чилийн Вальпараисо боомт хотын баруун захад өнгөрсөн бямба гаригт гарсан гал тэлж, их хэмжээний түймэр дэгдээжээ. Түймрийн улмаас Вальпараисо хотод12 хүн амь үрэгдэж, 10 мянга гаруй оршин суугчийг нүүлгэн шилжүүлжээ. Оршин суугчдыг нүүлгэн шилжүүлэхэд цэргийнхнийг дайчилсан бөгөөд түймрийг унтраахаар 1200 орчим гал сөнөөгч ажиллаж байгаа аж. Чилийн албаныхны мэдээлснээр хотын төв рүү түрсээр байгаа аймшигт түймэрт олон зуун айлын байшин, сууц шатаж сүйджээ. Үүний зэрэгцээ Номхон далайн хүчтэй салхины нөлөөгөөр түймэр хөрш хотууд руу тархаж эхлээд байгаа гэнэ. Одоогоор Вальпараисо хотод гарсан галын шалтгаан тодорхойгүй байна.

Энэ нь Чилийн Ерөнхийлөгч Мишель Бачелетийн улиран сонгогдсоноос хойш тохиосон хоёр дахь онц нөхцөл байдал юм. Өмнө нь энэ дөрөвдүгээр сарын 1-нд Чилид 8.2 магнитудын хүчтэй газар хөдлөлт болж, цунамийн гамшиг учрах эрсдэл үүсч байсан юм.