Товчхондоо бол “жолооны хүрд” монголчуудын гарт байна. Хүрдийг зөв эргүүлж чадвал мэдээж амжилтад хүрэх учиртай. Аан харин байдал дээрдэхгүй бол эдийн засгийн өсөлт 1 оронтой тоо руу гулсахад бэлэн байна.
 
Өнгөрсөн аравдугаар сард Дэлхийн банк манай улсын 2014 оны эдийн засгийн өсөлтийг 10.3 хувьд хүрнэ хэмээн таамаглаж байсан. Харин энэ удаад 2014 онд Монголын эдийн засгийн өсөлт 11.4 хувьд хүрнэ гэж мэдэгдлээ. Өөрөөр хэлбэл, Дэлхийн банк Монголын эдийн засгийн таамаглалаа дээшлүүлж байна. Олон улсын байгууллага ийнхүү Монголыг эерэгээр харахад он гарсаар хэрэгжиж эхэлсэн хуулиуд, 2013 оны эдийн засгийн өсөлт, эдийн засгийн мөчлөг сөрсөн бодлогуудыг амжилттай хэрэгжүүлсэн зэрэг нь нөлөөлжээ. Мөн 2014 он гарсаар хөрөнгө оруулалт нэмэгдсэн, эдийн засгийн голлох салбаруудын бодлого тодорхой болсон зэрэг сайн үзүүлэлтүүдийг анхаарч үзсэн байна.

Өнгөрсөн 2013 он Монголын эдийн засгийн хувьд хүнд жил байсан. Хэрвээ бодлогын арга хэмжээ аваагүй бол эдийн засаг өсөх бус бүр унах ч эрсдэлтэй байсан гэж буй. Гэхдээ Монголбанк болон Засгийн газар хамтран эдийн засгийн мөчлөг сөрсөн бодлого хэрэгжүүлж, бодит секторыг хамгаалсан бодлого явуулснаар зөвхөн барилгын секторт л гэхэд 125 хувийн өсөлтийг бий болгож чадсан. Үүнийг яах аргагүй амжилт гэж дүгнэх хэрэгтэй болов уу. Мөн 2013 оны сүүлээр Хөрөнгө оруулалтын тухай хууль, Хөрөнгө оруулалтын сангийн тухай хуулиудыг баталсан. 2014 он гарсаар Эрдэс баялгийн салбарт төрөөс баримтлах бодлогын баримт бичиг, Ашигт малтмалын тухай хуулийн нэмэлт өөрчлөлт зэрэг чухал хуулийг баталж, хэрэгжүүлж эхэлсэн билээ. Өөрөөр хэлбэл, монголчуудын хувьд 2013 он хамгийн хүнд жил байсан ч бодлогын арга хэмжээ авснаар магадгүй хамгийн өндөр амжилттайгаар даван туулжээ. Үүний үр дүн олон улсын байгууллагын эерэг үнэлгээ байв.

Нөгөөтэйгүүр олон улсын байгууллага Монголын эдийн засгийг ийнхүү эерэгээр харлаа гээд санаа амарч болохгүй гэдэгтэй хэн ч санал нийлэх биз. Бодит байдал дээр он гарсаар нүүрсний экспорт сайнгүй байна. Мөн Оюутолгойн хэлэлцээрт төдийлөн ахиц, дэвшил гарахгүй, хүлээлтийн байдалтай байсаар л. Энэ янзаар удвал эерэг хүлээлт сөрөг болж өөрчлөгдөхийг ч үгүйсгэхгүй. Мөн ГШХО дорвитой, томоохон нэмэгдэж өгөхгүй байна. Эсрэгээрээ хүлээлттэй буй зарим асуудлыг шийдвэрлэж, бодлогын илүү сайн арга хэмжээ авбал, эдийн засгийн өсөлтийн таамаглал үүнээс ч дээш гарч болох юм. Товчхондоо бол “жолооны хүрд” монголчуудын гарт байна. Хүрдийг зөв эргүүлж чадвал мэдээж амжилтад хүрэх учиртай. Аан харин байдал дээрдэхгүй бол эдийн засгийн өсөлт 1 оронтой тоо руу гулсахад бэлэн байна.

Дэлхийн банкны таамаглалын хувьд 2014 онд ийнхүү хоёр оронтой тоогоор өсөхөөр байгаа ч 2015, 2016 онуудад өсөлтийн хурд удааширна гэж таамагласан байна билээ. Гэхдээ Засгийн газар эдийн засагт орж ирэх гадаад валютын урсгалаа эрс сайн нэмэгдүүлж чадах юм бол эдийн засгийн өсөлтөө энэ онд ч  хоёр оронтой тоонд барих  боломж бий.

Зүүн Ази, Номхон далайн бүс: ДНБ-ий өсөлт /төсөөлөл/
 

			Урьдчилсан мэдээ			2013 оны 10 сараас хойшхи өөрчлөлт /хувь/
	2012	2013	2014	2015	2016	2014	2015
Зүүн Ази, Номхон далайн хөгжиж буй орнууд:	7.4	7.2	7.1	7.1	7.1	-0.1	-0.1
Хятад	7.7	7.7	7.6	7.5	7.5	-0.1	0.0
Индонез	6.3	5.8	5.3	5.6	5.6	0.0	-0.2
Малайз	5.6	4.7	4.9	5.0	5.0	0.1	0.2
Монгол	12.4	11.7	11.4	9.2	7.6	1.1	-0.8