Оросын Холбооны аюулгүй байдлын албанаас тус улсад террорист халдлага үйлдэхээр төлөвлөсөн хэрэгт буруутган 25 украин хүнийг баривчилжээ. Оросын хууль тогтоогчдын мэдээлснээр украинчууд өнгөрсөн гуравдугаар сард болсон Крымын бүх нийтийн санал асуулгын үеэр ОХУ-ын олон хотод террорист халдлага үйлдэхээр төлөвлөж байсан гэнэ. Тэднийг өнгөрсөн гуравдугаар сарын 14-17-ны хооронд ОХУ-ын Ростов, Волгоград, Тверь, Орел хот болон Хальмаг, Татарстан зэрэг газруудад террорист халдлага үйлдэхээр төлөвлөсөн хэрэг сэжиглэж буй аж. Түүнчлэн тэднийг армийн үйл ажиллагааны зургийг дарж, хэт даврагчидтай холбоо тогтоохыг оролдсонд буруутгажээ. Кремлийн хууль тогтоогчид ОХУ-д баривчлагдаад буй украины 25 иргэнийг хэт үндсэрхэг үзэлтний хөдөлгөөний гишүүд хэмээн мэдэгджээ.

Харин Киевийн эрх баригчид Москвад баривчлагдаад буй украинчуудыг ОХУ-д террорист  халдлага үйлдэхээр төлөвлөсөн гэдгийг эрс үгүйсгэсэн байна. Үүний зэрэгцээ Киевт энэ оны эхээр эсэргүүцлийн жагсаал, цуглаан өрнөж байхад Оросын Холбооны аюулгүй байдлын албаны 30 алба хаагч Засгийн газрын эсрэг жагсагчдын эсрэг ажиллагаанд оролцсон гэж хариу буруутгажээ. 

Түүнчлэн Украины Дотоод хэргийн сайд Арсен Абаков өнгөрсөн хоёрдугаар сард Киевт Засгийн газрын эсрэг жагсагчид руу гал нээсэн тусгай хүчний цагдаагийн албан хаагчдыг илрүүлсэн гэж мэдэгджээ. Түүний мэдээлснээр жагсагчид руу гал нээсэн мэргэн буучид нь “Беркут” цагдаагийн тусгайгийн 12 алба хаагч байсан гэнэ. Киевт өнгөрсөн хоёрдугаар сарын 18-20-ны өдрүүдэд Их сургуулийн  гудамж болон Майданы талбайн ойролцоо мэргэн буучдын суманд 76 хүн амь үрэгдсэн аж.