“Эх орон-36” хөтөлбөрийн үндэсний сургагч багш бэлтгэх сургалт өчигдөр нээлтээ хийлээ. Энэ жил тус хөтөлбөрийн хамрах хүрээг өргөжүүлэн орон нутагт буюу эхний ээлжинд таван аймагт хэрэгжүүлэхээр болсон байна.  Энэ хүрээнд “Эх орон -36” хөтөлбөрийг орон нутагт хэрэгжүүлэх үндэсний сургагч багш нарыг бэлтгэх сургалт  Олон улсын хүүхдийн Найрамдал зусланд хоёр дахь өдрөө үргэлжилж байна.  Үндэсний сургагч багш бэлтгэх сургалтын нээлтийн ажиллагаанд уг хөтөлбөрийг санаачлагч Хүн амын хөгжил, нийгмийн хамгаалал /ХАХНХ/-ын сайд С.Эрдэнэ, Хүүхдийн төлөө газрын  дарга И.Нарантуяа, Батлан  хамгаалахын их сургуулийн захирал хошууч генерал Я.Чойжамц болон Монголын зуслангуудын холбоо, Скаутын холбооны төлөөлөл оролцлоо. Сургалтад аймаг, дүүргийн ерөнхий боловсролын дунд сургуулийн  нийгмийн ажилтан, сургуулийн эмч, биеийн тамирын багш, Хүүхэд гэр бүлийн хөгжлийн хэлтсийн мэргэжилтэн албан хаагчаас бүрдсэн 250 гаруй төлөөлөл хамрагдаж, “Эх орон-36 хөтөлбөрийг орон нутагт хэрэгжүүлэх сургалтын арга зүйп суралцаж байна.

Тус хөтөлбөрийн хүрээнд сургагч багш нарыг бэлтгэснээр энэ жил “Эх орон -36” хөтөлбөрт 8000,  явуулын сургалтаар 4000 гаруй нийт 12000 орчим хүүхэд, өсвөр үеийнхнийг хамруулахаар төлөвлөжээ. Монголын хүүхэд, өсвөр үеийнхэнд эх оронч үзэл төлөвшүүлэх, эр зоригийн чадваруудыг эзэмшүүлэх, бие даасан байдал, оролцоог нь дэмжих, бүтээлч сэтгэлгээтэй, оюунлаг, өрсөлдөх чадвартай иргэн бэлтгэхэд зориулсан  “Эх орон -36” хөтөлбөр хэрэгжиж эхэлсэнээр өсвөр үеийн хүүхдүүдэд 36 төрлийн чадамжийг 36 цагийн сургалтаар заах юм.  Өнгөрсөн жил тус хөтөлбөрт нийслэлийн төвийн зургаан дүүргийн  2500 орчим хүүхэд хамрагдаж, эх орноо хайрлах, аливаа эрсдэлийг даван туулах тэсвэр тэвчээр, бие даах чадварт суралцсан байна. 

Монгол Улсын Засгийн газрын 2012-2016 оны үйл ажиллагааны хөтөлбөрт тусгагдсан эх оронч сэтгэлгээтэй, амьдрах ухаанд суралцсан иргэн төлөвшүүлэхэд чиглэсэн “Зөв Монгол хүүхэд” хөтөлбөрийг баталсан. Энэ хөтөлбөрийн хүрээнд “Эх орон-36” хүүхдийн хөгжлийн шаталсан хөтөлбөрийг УИХ-ын гишүүн С.Одонтуяа, ХАХНХ-ын сайд С.Эрдэнэ нар санаачлан хоёр дахь жилдээ хэрэгжүүлж байгаа билээ.