Амраа эрхий мэргэнээ сорино

Хуучирсан мэдээ: 2011.05.09-нд нийтлэгдсэн

Амраа эрхий мэргэнээ сорино

Өвөрмөц стиль, этгээд хэв маяг, үндсэрхэг үзэл, Монгол бүжгийн домог Сэвжидийн ач, Төрийн соёрхолт С.Сүхбаатарын хүү, “Хар сарнай” хамтлаг…

Амраад маш олон тодорхойлолт бий. Гэхдээ “Хар сарнай”-гийн гэдгээр нь хүмүүс ихэвчлэн овоглодог байх. Үүний араас түүнийг рок попын хамгийн стильдээ үнэнч дуучин, хамгийн сайн бүжигчин гэхчлэн яаж ч рекламдаж болно. Монголын урлагт үнэтэй хувь нэмэр оруулсан гайхамшигтай гэр бүлээс төрсөн энэ залуу хамгийн мундаг нь үндсэрхэг, уламжлалт сэтгэлгээтэйгээрээ бусдаас ялгардаг.

Гадаад төрх, хувцаслалт, характер…Ер нь түүнийг анх хараад хэнд ч монгол ахуйд ойр хүн гэж шууд санагдахгүй. Харин Амраа ишиг, хурга хариулж, эмээ өвөөдөө тусалж өссөн бага насны “малчин” амьдралдаа хамгийн таатай ханддаг гэдэг.

Монгол бүжиг, монгол ахуй, монгол дээл гээд Монголоороо гоёх дуртай рок залуу сүүлийн жилүүдэд нум сумаар хичээллэдэг болсныг та дуулсан байж магадгүй юм. Тэгвэл шаггүй мэргэн харвадаг, дуучин Амраа Хүннү гүрэн байгуулагдсаны 2220 жил, Ардын хувьсгалын 90 жилийн ойн баяр наадмын үндэсний сурын бэлтгэлээ базааж эхлээд байгаа гэнэ. Багадаа хурдны морь унаж өссөн Амраад дунд сургуульд байхдаа одоогийн улсын гарьд Б.Гантогтох нарын хамт бөхөөр хичээллэж явсан үе бий. Сайн эр хүнийг найранд гурван дуутай, наадамд гурван даваатай гэж ярьдаг шиг морь унаж, ноцолдож өссөн Амраа эрийн гурван наадамд эрхий мэргэнээ үзээд алдахаар шийдсэн нь энэ юм. Эр хүний боддог л бодол.

Б.Ирмүүн

NewsMN Гар утасны хувилбар Татах
NEWS.mn

Мэдээллийн эх сурвалж