Цаг агаарын нөхцөл байдлаас шалтгаалан түр саатаад байсан Малайзын агаарын тээврийн Боинг 777-200 онгоцыг хайх эрлийн ажил Энэтхэгийн далайн өмнөд хэсэгт өнөөдөр /III.26/ дахин эхэллээ. Хүчтэй салхи, борооны улмаас эрэл өчигдөр /III.25/ түр зогсохоос өмнө Австрали, Францын эрлийн багийнхан Энэтхэгийн далайн өмнөд хэсгээс сураггүй болсон онгоцны сэг байж болох зүйлс олсон талаар мэдээлж байсан юм. Энэ нь  саарал, эсвэл ногоон өнгөтэй, дугуй хэлбэртэй, өөр нэг нь дөрвөлжин, шаргал өнгөтэй зүйл байсан аж.

Австралийн далайн эргүүл хамгаалалтын удирдлага (Amsa)-аас мэдээлснээр лхагва гаригт дахин эхлүүлсэн 370-р нислэгийн эрэлд зургаан орны 12 онгоц оролцож байна. Үүнд Австрали, Шинэ-Зеланд, АНУ, Япон, Хятад, Өмнөд Солонгосын цэргийн долоо, иргэний таван онгоц оролцож, Перт хотоос 2500 км зайтай газар хайгуул, самналт хийж байгаа аж.

Үүний зэрэгцээ Австрали, Хятадын эрлийн багийнхны ирүүлсэн мэдээлэлд үндэслэн даваа гаригт /III.24/ Малайзын Ерөнхий сайд Нажиб Разак Малайзын агаарын тээврийн 370-р нислэг Энэтхэгийн далайн өмнө хэсэгт осолдсон гэж дүгнэснээ мэдэгдсэн билээ. Мөн тэрээр Боинг 777-200 онгоц далайд осолдсон гэж үзэж буй тул 227 зорчигч, нислэгийн багийн 12 гишүүн бүгд амь үрэгдсэнд тооцсон юм.