НАТО-гийн Европ дахь цэргийн командлалаас ОХУ-д хандан Украины хил дээр цэргийн хүчээ хуримтлуулахгүй байхыг анхааруулжээ. НАТО-гийн АНУ, Европын холбооны нэгдсэн командлалын генерал Филип Брийдловын мэдэгдсэнээр Умард Атлантын цэргийн эвсэл нь Молдав, Украины хилийн Днестр голын бүсэд аюул заналхийлэл буйг мэдэрч буй аж.

Түүнчлэн Украины Гадаад хэргийн сайд Андрей Дещица Кремль, Киевийн хооронд дайны аюул нэмэгдсээр байгааг анхааруулсан байна. Мөн тэрээр “ОХУ-ын эрх баригчид Украины Засгийн газартай төдийгүй барууныхантай яриа хэлцэл хийхийг хүсэхгүй байгаад асуудал байна” хэмээн мэдэгджээ. Харин ОХУ-ын зүгээс Украины зүүн хэсэгт байршуулсан цэргийн хүч нь олон улсын гэрээ хэлцлийн хүрээнд буйг мэдэгджээ. Кремлийн эрх баригчид Крым Украинаас салж ОХУ-д нэгдэхээр тэмцэж эхэлсэнтэй зэрэгцэн хойгт өөрийн цэргийн хүчээ хүчирхэгжүүлсэн билээ. Түүнчлэн АНУ-ын зүгээс ч Украинд цэргээ илгээхээр шийдвэрлээд байгаа юм.

Үүний зэрэгцээ Украинаас татсан цахилгааны шугамыг тасалснаас өчигдөр /III.23/ Крымын хойгт гэрэл, цахилгаан тасарсан байна. Крымын хойг нь цахилгаанаас гадна хоол хүнс, ундны усныхаа хэрэгцээний ихэнхи хувийг Украины эх газраас залгуулдаг аж.