Малайзын агаарын тээврийн 370-р нислэгийг үйлдэж явсан “Boeing 777-200ER” онгоц Энэтхэгийн далайд осолдсон байх магадлал өдрөөс өдөрт нэмэгдсээр байна. Учир нь Хятад, Австралийн сансарын хиймэл дагуулын зурагт Энэтхэгийн далайн өмнөд хэсэгт сураггүй болсон онгоцны сэг байж болзошгүй зүйлс илэрсэн талаар албаныхан мэдээлсэн. Гэтэл өчигдөр /III.23/ Францын сансарын хиймэл дагуулд дахин онгоцны сэг байж болох зүйлс илэрсэн гэж Зам, тээврийн яамнаас мэдэгджээ. Үүний дагуу ням гаригт /III.23/ Энэтхэгийн далайн өмнөд хэсэгт АНУ, Шинэ-Зеланд, Их Британи, Хятад, Япон, Австралийн цэргийн онгоц, хөлөг онгоцнууд дахин хайгуул хийж эхэлсэн байна. Өмнө нь Австралийн хиймэл дагуулын зургийн дагуу олон улсын эрлийн хамтарсан баг Энэтхэгийн өмнөд хэсгийн далайн зурваст гурван хоног нэгжлэг, самналт хийсэн боловч юу ч ололгүй эрэл зогсоод байсан юм.

Олон улсын хамтарсан эрлийн баг өчигдөр /III.23/ 10 цаг гаруйн хугацаанд Австралийн Перт хотоос 2500 км-ийн зайнд  Энэтхэгийн далайн өмнөд хэсэгт хайгуул, самналтын ажлыг гүйцэтгэсэн аж. Гэвч эрлийн ажилд цаг агаарын байдал хүндрэл учруулж буй талаар Австралийн эрлийн багийнхан мэдэгджээ. Олон улсын хамтарсан эрлийн ажил өнөөдөр /III.23/ Энэтхэгийн далайд үргэлжлэн хийгдэж байгаа аж.

Одоогийн байдлаар Австрали, Хятад, Францын сансарын хиймэл дагуулын зурагт илэрсэн зүйлс ижил эсвэл өөр шинэ зүйл үү гэдэг нь тодорхойгүй байна. Үүний зэрэгцээ албаныхны үзэж буйгаар гурван улсын хиймэл дагуулын зурагт илэрсэн онгоцны сэг байж болох зүйлс далайн ёроолд живчихээд, удалгүй хөвж гарч ирээд байгаа бололтой. Үүгээр 20 гаруй орны хамтарсан эрлийн баг хиймэл дагуулын зурагт илэрсэн онгоцны сэг байж болзошгүй зүйлсийг олж чадахгүй байгааг тайлбарлаж болох аж.

Малайзын агаарын тээврийн 370-р нислэгийг үйлдэж явсан “Boeing 777-200ER” онгоц энэ гуравдугаар сарын 8-нд Куала Лумпураас Бээжинг чиглэн хөөрснийхөө дараа радарын дэлгэцнээс алга болж, холбоо тасарснаар сураггүй болсон билээ.