Венесуэлд Засгийн газрыг огцруулахын төлөөх жагсаал цуглаан сар гаруй хугацаанд үргэлжилж, 31 хүн амь үрэгдээд байна. Үүний зэрэгцээ Венесуэлийн эрх баригчид бослого, үймээний улмаас сөрөг хүчний хоёр хотын захирагчийг огцруулан баривчилсан нь ард иргэдийн эсэргүүцлийг улам өдөөжээ. Венесуэлийн нийслэл Каракас хотноо өчигдөр /III.20/ цагдаа нар болон жагсагчдын хооронд ширүүн мөргөлдөөн болсон байна.

Венесуэлийн тагнуулын агентлагаас Сан Кристобал, Сан Диего хотуудын захирагчдыг баривчилсан аж. Эрх баригчдын зүгээс сөрөг хүчний жагсагчдыг цэргийн эргэлт хийхээр оролдож буйд буруутган цагдаа, хүчнийхний хүчээр эсэргүүцлийн жагсаалыг дарахаар хичээж байна.

Үүнээс өмнө Венесуэлийн сөрөг хүчнийхнийг төлөөлөн Энрике Каприлес Ерөнхийлөгч Николас Мадуротой хэлэлцээ хийх санал тавьсан боловч хүлээж аваагүй аж. Венесуэлийн сөрөг хүчнийхэн гэмт хэрэг, инфляци, бараа бүтээгдэхүүний хомсдол нэмэгдсэнд Ерөнхийлөгч Николас Мадурог буруутган огцрохыг шаардаж, дээрх бослогыг эхлүүлсэн билээ.