Украинаас Крымыг булаасны хариуд ОХУ-ын эсрэг АНУ, Европын холбоо эдийн засгийн хоригоор сүрдүүлж эхэлсэн билээ. Үүнтэй зэрэгцэн өчигдөр /III.19/ Ираны цөмийн хөтөлбөрийг хумих асуудлаарх уулзалт эхэлсэн нь цагаа олоогүй хэлэлцээ байлаа. АНУ, ОХУ хоёр орон лхагва гаригт /III.19/ Ираны асуудлаарх уулзалтын эхний өдөр нэг ширээний ард суусан боловч эсрэг сүрдүүлгийн үгс шидэлцсээр таржээ. Энэ үеэр ОХУ-ын төлөөлөгчдийн зүгээс Кремлийн эсрэг барууныхны хоригийн хариуд Ираны цөмийн хөтөлбөрийг хумихын эсрэг чиглэсэн хариу үйлдэл хийж болзошгүй гэж сүрдүүлсэн байна.

ОХУ-ын Гадаад хэргийн сайдын орлогч Сергей Рябков “Украинаас Крымыг буцаан авснаас үүдэн Москвагийн эсрэг барууныхан хориг  тавих нь эргээд маш том аюул авчрах болно” хэмээн мэдэгджээ. Ийнхүү ОХУ-ын зүгээс барууныхны эсрэг ширүүн заналхийллээр Ираны цөмийн хөтөлбөрийн асуудлаарх уулзалт өндөрлөсөн байна. Гэхдээ уулзалтын дараа АНУ-ын Төрийн департментын хэвлэлийн төлөөлөгч Женнифер Псаки ОХУ нь Ираны асуудлаар яриа хэлэлцээрийн идэвхитэй хамтрагч хэвээр байгааг онцлон мэдэгджээ.

ОХУ нь удаан үргэлжилж буй Ираны цөмийн хөтөлбөрийн асуудалд Тегераныг ятгах гол орон билээ. Үүний зэрэгцээ Ираны цөмийн хөтөлбөрийг хумих асуудалд АНУ, ОХУ нь ялгаатай байр суурь баримталсаар ирсэн бөгөөд үүнийг Тегераны эрх баригчид ашиглахыг оролддог юм.