МАХН-ын Анхдагчдын холбооны тэргүүлэгч гишүүн С.Хорлоо өнөөдөр хэвлэлийнхэнд хандлаа. Тэрээр “Анхдагчдын холбоо”-ны гишүүд болох Ч.Азар, Г.Баярсайхан нар МАХН-ыг дотроос нь хагалган бутаргах зорилгоор намын дэд дарга Д.Тэрбишдагва, ерөнхий нарийн бичгийн дарга Г.Шийлэгдамба нарыг огцруулахыг шаардаж, янз бүрийн мэдэгдэл хийж байна. “Анхдагчдын холбоо”-ноос тавьж ирсэн саналын дагуу дүүргийн намын хороодын дарга нар долоо хоног тутамд гишүүдийнхээ санал бодлыг сонсдог болсон. МАХН-ын дэд дарга, ерөнхий нарийн бичгийн дарга нартай уулзах боломж ч бий. Гэтэл Г.Баярсайхан нар ажилгүй болсондоо хонзон санан дэд дарга Д.Тэрбишдагвыг огцрохыг шаардаж байна.

Г.Баярсайхан өмнө нь Мэргэжлийн хяналтын газрын даргаар томилогдож байсан. Нийслэлийн Засаг дарга бөгөөд Улаанбаатар хотын захирагч Э.Бат-Үүлтэй таарамж муутай байсан учраас ажлаасаа чөлөөлөгдсөн. Ийм байтал үүнд Д.Тэрбишдагва даргыг буруутгаж байгаа нь зохисгүй. Төрийн ажлыг урагшлуулахын тулд хэнийг ч байсан албан тушаалаас нь чөлөөлж л таарна, танил тал, намын хүн гээд хаацайлж сууж таарахгүй. Энэ бүхний учрыг мэдэх атлаа МАХН-ын удирдлагуудыг огцруулахгүй бол болохоо байлаа гэж мэдэгдэл хийж буй нь намын нэр хүндийг унагаж байна” гэсэн юм.

Мөн МАХН-ын дэргэдэх Анхдагчдын холбоо нь удирдлагуудынхаа болохгүйг хэлж засч залруулж, болж бүтэж байгааг нь дэмжиж зөвлөж ажиллахаар үүсгэн байгуулагдсан. Энэ зорилгоосоо зарим гишүүн буцаж, намын эсрэг ажиллагаа явуулахад чиглэж байна гэлээ.