by Ука Төмөр

Бусадтай өөрийгөө харьцуулах нь муу зуршил.
Бусадтай өөрийгөө харьцулснаар нэг бол би бусдаас илүү гэж биеэ хэт тоох эсвэл
би бусдаас ямар нэг байдлаараа дутмаг гэж биеэ голдог. Гэхдээ ихэвчлэн 2 дахь
нь илүү ажиглагддаг.

Бусадтай өөрийгөө харьцуулснаар үзэн ядалт,
бухимдал дургүйцэл, атаархал үүсдэг учраас биднийг аз жаргалгүй болгодог.
Хэрвээ бид байнга өөрсдийгөө бусадтай харьцуулаад байвал хэзээ ч аз жаргалтай
амьдарч чадахгүй.

“Амжилтын Тарни” номын 200-р
хуудас

Өөрийгөө бусадтай харьцулснаар өөрийгөө аль
нэг байдлаараа дутмаг гэж үзэж, өөрийн үнэлэмж, өөртөө итгэх итгэлийг алддаг.

Жишээлбэл: Тэр надаас илүү ухаантай, тэр
надаас илүү гоё ажилтай, гоё машинтай, гоё биетэй, сайхан гэр бүлтэй, надаас
илүү амжилттай гэтэл миний байгааг хар, миний биеийг  хар, миний хийж буй
ажлыг хар, миний гэр бүлийг хар… гэх мэтчилэн харьцуулснаар өөрийнхөө тухай,
амьдралынхаа тухай таагүй бодолтой болж, өөрийгөө хангалтгүйд тооцдог. Хэрвээ
энэ байдал удаан үргэлжилбэл бид бусдын (нөгөө харьцуулж буй хүнийхээ) эсрэг
зогсож, хангалтгүй, амжилтгүй байгаасай гэж хүсч эхэлдэг. Муухай байгаа биз
дээ.  Гэхдээ энэ бол хүнд байдаг муухай зан. Тиймээс өөрийгөө бусадтай
харьцуулахаа зогсоо.

Амжилттай яваа хүн өөрийгөө хэзээ ч бусадтай
харьцуулдаггүй. Хэрвээ харьцуулах шаардлагатай бол “өөрөө өмнө нь ямар байсан
бэ? одоо ямар байна вэ? хэр их өсч хөгжсөн байна вэ? ирээдүйд ямар байх вэ? хэр
их өсч хөгжсон байх вэ?” гэдгийг харьцуулдаг.

Дэлхий дээр 7 тэрбум хүн бий. Тэр дундаас ТА
бол ганцхан. Та өөрөөрөө байснаар тантай өрсөлдөж чадах хүн байхгүй. Та
өөрөөрөө байснаар өөрийгөө энэ дэлхий дээр ганцхан болгож чадаж байгаа
юм. Та өвөрмөц, танд өөрийн гэсэн онцгой зан чанар, дүр төрх бий.

Гэвч харамсалтай нь бид үүнийг заримдаа
мартдаг учраас хэн нэгэнтэй өөригйөө харьцуулж, хэн нэгэнтэй адилхан болохыг
хүсдэг.

Санаж яв: Зөвхөн та өөрийгөө
онцгой болгож чадна. Онцгой болгож чадсанаараа та ТА гэдгийг мартаж болохгүй.

Бусадтай өөрийгөө харьцуулах нь ямар ч үр
ашиггүй. Бусадтай өөрийгөө харьцуулснаар бид эрч хүч, цог жавхаа, бүтээлч
байдлаа алддаг.  Тиймээс анхаарлаа өөрлүгээ төвлөрүүл. Танд ямар авьяас
чадвар байна вэ, та юу хийж чадах вэ, таны амьдралд юу юу байна вэ гэдэг дээр
анхаарлаа төвлөрүүл.

Хэрвээ танд байхгүй зүйл бусдад байгаа бол
өөрөөсөө “Би байхгүйгээ бий болгохын тулд юу хийх вэ? Би тэр хүний дайтай
болохын тулд юу сурах вэ?” гэдэг асуултыг асуугаарай. Ингэж чадвал та
өөрөөсөө олон сайхан зан чанар, чадваруудыг илрүүлэх болно.

Тиймээс өнөөдөр өөрөөрөө байх сайхан бэлгийг
өөртөө бэлэг болгон бариарай.

Бусадтай өөрийгөө
харьцуулахаа зогсоо !

АМЖИЛТЫН
ТАРНИ

Би өөрт байгаа сайн сайхан
бүхнийг харж чаддаг учраас бусдад байгаа сайн сайхан бүхнийг олж хардаг!