ОХУ-ын Сочи
хотноо гуравдугаар сарын 7-нд нээлтээ хийсэн 2014 оны паралимпийн наадам өндөрлөлөө. 2014 оны Сочийн  XI паралимпийн наадамд 45 орны 1650 гаруй пара
тамирчид спортын таван төрөлд 72 багц медалийн
төлөө өрсөлдлөө. Манай улсаас 2014 оны
Сочийн паралимпад Монголын багийн ахлагчаар Монголын паралимпийн хорооны дэд ерөнхийлөгч Д.Сүрэнхорлоо, дасгалжуулагч
Ж.Дашдондог, техникийн дасгалжуулагчаар Н.Сандагдорж, тамирчин Б.Ганболд,
хэвлэл мэдээллийн төлөөлөгчөөр МҮОНТ-ийн сурвалжлагч Д.Батжаргал гэсэн таван хүний бүрэлдэхүүнтэй оролцож байна. Манай
тамирчин Б.Ганболд гүйлтийн цанын LW6 босоо ангилалд /гарны бэртэл/ оролцлоо. Түүний хувьд цанын төрлөөр гуравдугаар сарын 10-нд
1000 метрийн ойрын зайд 14 дүгээр байрт, 12-нд 10 км-ийн сонгомол техникийн төрөлд 25, 16-нд буюу хаалтын өдөр 20 км-ийн тэших техникээр 31 дүгээр байрт шалгарлаа.

2014 оны
паралимпийн наадмыг 30 алт, 28 мөнгө, 22 хүрэл медаль хүртсэн ОХУ илт давуу медалийн тоо, чанараар тэргүүллээ. Харин есөн алт, таван мөнгө, нэг хүрэл медальтай Герман улс хоёрдугаар байрт, долоон алт, хоёр мөнгө, долоон хүрэл медаль хүртсэн Канадын баг тамирчид гуравдугаар байрт шалгарлаа.

Б.БИЛЭГ