Хэрэглэгчдийнхээ тоогоор фейсбүүкийн дараа ордог олон нийтийн сүлжээ сайт болох твиттер хэсэг хугацаанд ажиллагаагүй болж саатжээ. Гэнэтийн саатлаас үүдэн олон хэрэглэгчид твиттертээ нэвтэрч чадахгүй болсон ба 46 минутын дараанаас хэвийн байдалдаа орж эхэлжээ.

Твиттер өөрийн албан ёсны блогтоо энэхүү асуудлын тухай албан ёсны мэдэгдлээ байршуулсан байна. Тус мэдэгдэлд дурьдсанаар гарсан асуудлыг хурдан хугацаанд тодорхойлж, хэвийн үйл ажиллагаагаа сэргээж эхэлсэн гэж бичжээ. Мөн одоо ч гэсэн зарим хэрэглэгчид гар утаснаасаа нэвтрэх үед алдаа гарч, хүндрэл үүсч байгаад хүлцэл өчсөн байна.