Нэг л өглөө босоод иртэл хаа сайгүй хүнсний ногоо хөглөрч хэвтэх нь харагдлаа. Хүнсний ногоо, жимс жимсгэнэ хортой гэж эрдэмтэн судлаачдын өнгөрсөн долоо хоногт хийсэн мэдэгдэл эзэгтэй нарыг хөргөгчнөөсөө хүнсний ногоогоо авч хогийн саванд хийхэд хүргэжээ. Зарим гэр бүл мах, гурилаа л идье гэх дүгнэлтийг шулуухан хийгээд амжив. Учир нь Эрүүл мэндийн шинжлэх ухааны сургууль/ЭМШУИС/-ийн багш Г.Эрдэнэчимэг болон Монголын хэрэглэгчдийн эрхийг хамгаалах нийгэмлэгүүдийн нэгдсэн холбооны ерөнхий нарийн бичгийн дарга Д.Чулуунбаатар нар Монгол орны хөрсөнд ургасан хүнсний ногооны 40 хувь, БНХАУ-аас оруулж ирсэн ногооны 80 хувь пестицид гэх хорт бодисын агууламжтай гэж /III.03/ мэдэгдсэн юм. Мөн тэд “Хортон шавжийг устгадаг пестицид гэх бодисыг ногоо тариалсан хүмүүс хэтрүүлэн хэрэглэснээс ийнхүү хүнсний ногоо, жимс жимсгэнэ хордож байна. Пестицидээр хорд­сон ногоог хэрэглэх нь төв мэд­рэлийн системд сөргөөр нөлөөлж, үргүйдэл, ургийн гаж хөгжил, хорт хавдар зэрэг өвчин үүсгэгч болдог. Тиймээс шинэ ургацын ногоо гартал хортой бодисоор бохирлогдсон хүнсний ногоо, жимс хэрэглэхээс татгалзах нь зүйтэй” гэж айлгав.

Ийнхүү мэдээлэл хийснээс  хоёр хоногийн дараа /III.05/ Үйлдвэр хөдөө аж ахуйн яам/ҮХААЯ/, Мэргэжлийн хяналтын ерөнхий газар/МХЕГ/, Эрүүл мэндийн яам/ЭМЯ/-наас хамтран хүнсний ногоо, жимс хор хөнөөлгүй гэж мэдэгдэж, ЭМШУИС, Хэрэглэгчдийн эрх ашгийг хамгаалах нэгдсэн холбооны судалгааг няцааж мэдээлэл хийсэн юм. Хурлын үеэр МХЕГ-ын улсын байцаагчид “2013 онд химийн бодисын үлдэгдэл буюу пестицидийн шинжилгээнд жимс, жимсгэний 615, хүнсний ногооны 655 дээжид 2573 үзүулэлтээр шинжилгээ авснаас эрүүл ахуйн шаардлага хангаагүй ногоо буюу пестицидийн үлдэгдэл илрээгүй. ЭМШУИС, Монголын хэрэглэгчдийн эрх ашгийг хамгаалах нийгэмлэгүүдийн нэгдсэн холбооноос худал мэдээлэл цацаж байна” гэж мэдээлэх нь тэр.

Эрдэмтэддээ итгэх үү, улсын байцаагч нарт үнэмших үү гэсэн бодол хэсэгтээ л монголчуудыг талцуулав.  Үүнээс болоод өнгөрсөн долоо хоногт худалдааны төв, захуудын хүнсний ногооны борлуулалт 40 орчим хувиар буурсан нь үнэн худал нь мэдэгдэхгүй энэхүү судалгааны хариу иргэдэд хэрхэн нөлөөлснийг харуулах болов уу.

 Мөн Төв аймгийн Борнуур, Жаргалант сумын ногоочид “Манай улс пестицид гэх бодисыг хамгийн бага хэрэглэдэг улсуудын нэг. Бид олон жилийн турш энэ бодисыг тун бага хэрэглэж байгаа. Иргэдэд ташаа мэдээлэл өгсөн албаны хүмүүс эрдэмтэн судлаачдыг манай суманд очиж дахин шинжилгээ хийхийг хүсч байна” гэж бас мэдээлсэн. За ямартай ч хүнсний ногоо хортой байсан гэдэг мэдээлэл ташаа юм байна гэж иргэд арайхийн тайвшрах гэж байтал “Аль байгууллагын судалгаа, мэдэгдэлд итгэхээ мэдэхгүй эргэлзэж байгаа иргэдэд хариулт өгнө” гэх нэрийн доор ЭМШУИС-иас өнгөрсөн баасан гаригт /III.07/-нд дахин мэдээлэл хийж “Дээж авч шинжилсэн хүнсний ногоо, жимс жимсгэний  40-80 нь пестицид гэх хорт бодисын агууламжтай байсан нь үнэн. Энэ нь зөвшөөрөгдөх хэмжээнээс 10-40 гаруй хувиар өндөр гэсэн үг” гэж учир нь үл ойлгогдох “бөөрөнхий” хариулт өгч, бүр төөрөгдүүлэх нь тэр. Энэ үеэр иргэдэд хүнсний ногооноос татгалзахыг анх уриалсан Монголын хэрэглэгчдийн эрхийг хамгаалах нийгэмлэгүү­дийн нэгдсэн хол­боо­ны ерөнхий нарийн бичгийн дарга Д.Чулуунбаатар “Би мэдээлэл хийхдээ дээж авсан ногооны гэж хэлэх гэж байгаад андуураад бүх хүнсний ногооны гээд ташаа хэлсэн байна лээ. Гэхдээ бидний захиалгаар шинжилгээ хийсэн ЭМШУИС-ийн шинжилгээ зөв байсан эсэхийг шалгуулах болно” гэж мэдэгдсэн юм.

Нэгэнт хүнсний ногоо хортой, хоргүй гэдэгт мэргэжлийн байгууллагуудын санал зөрөлдөж, учир нь олдохгүй байгаа тул хүнсний ногоо, жимс  хэрэглэх эсэхээ иргэд өөрсдөө сонгох нь зөв бололтой. Махны үнээ дийлэхгүй монголчууд ногоогоор хоолоо арвижуулдаг нь нууц биш. Харин энэ үнэн худал нь мэдэгдэхгүй мэдээлэл ногооны борлуулалтыг бууруулахаас гадна махны ханшийг хөөрөгдөхгүй гэх баталгаа алга. Хүнсний ногоо хортой эсхүл хоргүйг дэнслээд өгөх албан тушаалтан байна уу, энэ улсад?! Эргэлзээг тайлах эцсийн дүгнэлт хэрэглэгч бидэнд хэрэгтэй байна.