АНУ-ын Төрийн нарийн бичгийн дарга Жон Керри Украинд үүсээд буй асуудлаар ОХУ-ын Гадаад хэргийн сайд Сергей Лавров болон Их Британи, Герман, Францын Гадаад хэргийн сайд нартай өчигдөр /III.5/ уулзалт хийжээ. Уулзалтын дараа Жон Керри Украины асуудлыг шийдвэрлэх яриа хэлцэл албан ёсоор эхэлснийг мэдэгджээ. Энэ уулзалтын үеэр Сергей Лавров Украины Гадаад хэргийн сайдын үүрэг гүйцэтгэгч Андрей Дещицатай уулзахаас татгалзсан байна. Учир нь ОХУ-ын Засгийн газар түүнийг хүлээн зөвшөөрөөгүй байгаа юм. Андрей Дещица нь Виктор Януковичийг Украинаас зугтсаны дараа шинээр байгуулагдсан Киевийн Засгийн газрын Гадаад хэргийн сайдын үүрэг гүйцэтгэгчээр ажиллаж буй юм.

Үүний зэрэгцээ Европын холбооны Гадаад хэргийн сайд нар лхагва гарагт АНУ-ын шаардлагын дагуу ОХУ-ын эсрэг авах эдийн засгийн хориг арга хэмжээний талаар хэлэлцжээ. Мөн Крым дэх ОХУ-ыг дэмжигчдэд НҮБ-ын төлөөлөгч, Данийн дипломат Роберт Серри барьцаалаад байснаас суллаж, Украинаас гаргасан байна.

ОХУ нь сүүлийн хэдэн өдөрт Крымд цэргийн хүчээ хуримтлуулах болсон нь НАТО-гийн санааг зовоож буй юм. Үүний хариуд АНУ-ын зүгээс Польш улстай цэрэг, армийн хамтын ажиллагаагаа нэмэгдүүлэхээр хөдөлж эхэлсэн байна. Мөн НАТО-гийн ерөнхий нарийн бичгийн дарга Андерс Фог Расмуссен ОХУ-ын талтай харилцаа, хамтын ажиллагаандаа бүрэн шинэчлэлт хийх болсоноо мэдэгджээ.