Монголын иргэний агаарын тээвэр/МИАТ/ компани БНСУ-ын “Сэй Юү” компанийг ерөнхий борлуулагчаар сонгож, таван жилийн хугацаатай хамтран ажиллах тухай гэрээ байгуулсан тухай мэдээлэл гараад байна. МИАТ компанийнхныг Төрийн өмчийн хороонд мэдэгдэлгүй, Төлөөлөн удирдах зөвлөлөө хуралдуулахгүйгээр ийнхүү гэрээ байгуулсан, энэхүү нууц гэрээний талаар нууц задруулсан МИАТ компанийн Бодлого төлөвлөлтийн газрын дарга С.Билэгсайхан, Бизнес хөгжлийн хэлтсийн дарга Ц.Бат нарыг ажлаас нь чөлөөлсөн гэх мэдээлэл тархаад байгаа юм.

Энэ талаар МИАТ компанийн хэвлэл мэдээллийн ажилтан н.Мандухайгаас тодруулахад,
-Бизнес хөгжлийн хэлтсийн дарга Ц.Бат, Бодлого төлөвлөлтийн хэлтсийн дарга С.Билэгсайхан нарыг өөрсдийн twitter хуудсаар компанитай байгуулсан хөдөлмөрийн гэрээ, хөдөлмөрийн дотоод журмыг зөрчин “Компанийн нэр хүндийг гутаах, удирдлагын зөвшөөрөлгүйгээр хэвлэл мэдээллийн хэрэгслээр компанийн нууцтай холбоотой мэдээллийг нийтлүүлсэн” учир халах сахилгын арга хэмжээ авсан. МИАТ компани БНСУ-ын “Сэй Юү” компанитай хамтран ажиллах гэрээ байгуулсан. Гэхдээ албан ёсны гэрээ биш юм. Мөн энэхүү гэрээтэй холбоотойгоор “Korean air” компаниас манай удирдлагуудад сануулга өгсөн гэх мэдээлэл ташаа” гэж хариуллаа.