“Оюутолгой” ХХК-ийн гүйцэтгэх захирал асан, “Рио Тинто” компанийн Монгол Улсыг хариуцсан захирал асан Камерон МакРэй Монгол Улсын ”Скай Паать Партнерс” (SkyPath Partners) компанийн ерөнхийлөгчөөр томилогджээ. Тус компани нь санхүү, стратеги удирдлагын зөвлөх үйлчилгээгээр мэргэшсэн хөрөнгө оруулалт зуучлалын фирм бөгөөд олон улсын санхүүгийн зах зээл дээр эргэлдэж буй хөрөнгө, үйлчилгээ, стандартыг Монголд нэвтрүүлж, энэ төрлийн нөөц, эх үүсвэр дутагдаж буй компани, салбаруудад мэргэжлийн цогц үйлчилгээг хүргэх зорилготой аж.

Камерон МакРэй нь 2010-2013 онд “Оюутолгой” компанийн гүйцэтгэх захирал бөгөөд “Рио Тинто” компанийн Монголыг хариуцсан захирлаар ажилласан юм. Тэрбээр “Оюутолгой”-г удирдаж байх үед Оюутолгойн  уурхай  бүтээн  байгуулалтаас  үйлдвэрлэлийн  шатанд  шилжиж,   зэсийн  баяжмалаа  экспортолж эхэлсэн билээ. Үүнээс өмнө тэрбээр “Рио Тинто” компанийн эрчим хүч, зэс, алмааз ба аж үйлдвэрийн эрдэс баялгийн газрыг тэргүүлж, Өмнөд Африк, Зимбабве зэрэг улсад ажиллаж байжээ.

Зургаан орны  уул  уурхайн  салбарт  31  жил  ажилласан  туршлагатай тэрбээр “Скай Паать Партнерс” компанийн ерөнхийлөгчөөс гадна тус компанийн ТУЗ-ийн даргын албыг давхар хаших юм байна.