Украины экс Ерөнхий сайд Юлия Тимошенкогийн хэргийн Ерөнхий прокуророос дахин шалгахаар болжээ. Украины Ерөнхий прокурорын үүрэг гүйцэтгэгч Олег Махницкийн “Риа Новости”-д мэдээлснээр прокурор гүйцэтгэх ажлынхаа хүрээнд Юлия Тимошенкогийн хэргийг дахин шалгаж, гэмт хэргийн бүрэлдэхүүн байгаа эсэхийг тогтоож, нотлох баримтгүй бол хэргийг хаах арга хэмжээ авах гэнэ.

Юлия Тимошенко Украины Засгийн 2009 онд ОХУ-тай байгуулсан байгалийн хийн гэрээнд эрх мэдлээ хэтрүүлэн улсад асар их хохирол авчирсан хэрэгт шүүхээс долоон жил шоронд хорих ял сонссон билээ. Харин Украины парламент өнгөрсөн бямба гаригт Юлия Тимошенког шоронгоос суллах шийдвэр гаргажээ.

Украинд өнгөрсөн арваннэгдүгээр сараас хойш Европын холбоо, чөлөөт худалдааны гэрээнд нэгдэхийн төлөөх Засгийн газрын эсрэг эсэргүүцлийн жагсаал үргэлжилж буй юм. Энэ байдал өнгөрсөн долоо хоногт бослого, хувьсгалын хэмжээнд хүрч, Украины Ерөнхийлөгч Виктор Янукович, Засгийн газрыг огцруулжээ.