Өнөөдөр агаар тэнгэр тун таагүй байна. Бүх нутгаар үүлэрхэг, цас орж байгаагийн дээр зарим газраар цасан шуурга шуурч эхэлжээ. Нийслэлд бүрхэг, бага зэргийн цас орж байна. Үүнээс болж агаарын тээврийн үйлчилгээнд саад учирч болзошгүй байгаагийн дээр гадаадын зарим эх сурвалжид МИАТ-ын цаг агаараас шалтгаалан онгоц саатсан тухай мэдээлэл гарчээ. Тиймээс бид МИАТ-ийн лавлах үйлчилгээнд холбогдож өнөөдрийн нислэгийн талаар мэдээлэл  авлаа. Тус газраас:

-Өнөөдөр манай компанийн хуваарьт нислэгүүд сааталгүй хэвийн байгаа. Өнөөдөр гадаадын зургаа, дотоодын долоон нислэгтэй байна. Гонконг, Сөүл, Станбул, Алмата, Бээжингийн хоёр удаагийн нислэг төлөвлөснөөс Туркийн нислэг бага зэрэг хойшлогдсон. Энэ нь Улаанбаатарын цаг агаараас шалтгаалаагүй. Очих газрын цаг агаарын шалтгаантай. Орон нутгийн долоон нислэг хэвийн байна. Өнөөдрийн хувьд Оюутолгой, Увс, Өлгий-Ховд, Баянхонгор-Алтай, Доной /Завхан/, Мөрөнгийн чиглэлд нислэг хэвийн үргэлжилж байна гэсэн мэдээллийг өглөө.