УИХ-ын чуулганы баасан гаригийн нэгдсэн хуралдаанаар Засгийн газрын үнэт цаас гаргахыг зөвшөөрөх тухай УИХ-ын тогтоолын төслийг хэлэлцэж байна. Засгийн газрын зүгээс ноос, ноолуурын салбарыг дэмжих зорилгоор 110 тэрбум төгрөг хүртэлх бонд гаргахаар дээрх тогтоолын төслийг УИХ-д өргөн мэдүүлсэн юм. Зорилго нь ноос, ноолуурын салбарт үйл ажиллагаа эрхэлж байгаа үндэсний үйлдвэрүүдээ дэмжих, энэ хүрээнд тус салбар дахь 6000 ажлын байрыг хадгалах, шинээр 1500 ажлын байр бий болгоход чиглэжээ.

Хэлэлцүүлгийн шатанд гишүүд үндэсний ноос, ноолуурын үйлдвэрүүдээ дэмжих зорилгоор бонд гаргах нь зөв алхам боловч, эргээд ноолуурын үнэд нөлөөлчих юм биш биз гэсэн анхааруулгыг өгч байна. Өнөөдрийн байдлаар 370 мянган малчин мал аж ахуй эрхэлдэг. Амьжиргааны гол хэрэгсэл нь мал аж ахуй бөгөөд ноос, ноолуураа тушааж амьдрал ахуйгаа залгуулдаг аж. Тиймээс Засгийн газраас гаргах бондын дэмжлэг ноос, ноолуурын үнийг унагачихгүй байх гэсэн баталгааг өгөх ёстой гэсэн хатуухан шаардлага ч тавьж байна.