Украинд сүүлийн өдрүүдэд тус улсын түүхэнд болоогүй цуст мөргөлдөөн хүчнийхэн болон жагсагчдын хооронд өрнөж байна. Украины эрх баригчид  өнгөрсөн мягмар гарагийн /II.18/ оройн 18:00 цагаас эхлүүлэн нийслэл Киев хотын төв талбай Майданаас жагсагчдыг хүчээр хөөн гаргахаар шийдвэрлэсэн юм. “Террористийн эсрэг ажиллагаа” нэртэй Киевийн жагсагчдын эсрэг хүч хэрэглэх ажиллагаа эхэлснээс хойш цагдаа, цэргийнхэн болон иргэд бие, биенийхээ эсрэг буу, галт зэвсэг ашиглаж байна. Үүний уршгаар олон мянган жагсагчид болон цагдаа, цэргийнхний хооронд цус асгаруулсан мөргөлдөөн эхэлсэн билээ. Киевийн албаныхны мэдээлснээр гурав хоног үргэлжилж буй мөргөлдөөний улмаас одоогийн байдлаар 75 хүн амь үрэгдэж, 571 хүн гэмтэж эмнэлэгт хүргэгджээ. Харин эмч, сөрөг хүчнийхний баталж буйгаар амь үрэгдэгсдийн тоо 100-д хүрсэн гэнэ. Хохирогчдын ихэнхи нь мэргэн буучдын суманд амь үрэгдсэн болохыг эх сурвалжууд мэдээлсэн байна. Түүнчлэн Украины дотоод хэргийн сайдын мэдээлснээр Майданы төвд байрлаж буй жагсагчид өчигдөр 67 цагдааг барьцаанд авч, 20 гаруй цагдааг гэмтээсэн гэнэ. Мөн эмх замбараагүй байдал, мөргөлдөөн Украины нийслэлээс гадна өөр олон хотод гарч эхлээд буй аж.

Үүний зэрэгцээ  “Улс орондоо  хүчирхийлэл явуулсан хариуцлага” -ыг тооцохоор Европын холбоо Украины эсрэг хориг арга хэмжээ авахаар болжээ. Европын холбооноос эхний ээлжинд Украины эрх баригчдын эсрэг визний болон эд хөрөнгийг нь царцаах, экспортыг зогсоох зэрэг хориг арга хэмжээ авах гэнэ. Харин АНУ-ын зүгээс хэдийнэ Украины эрх барих 20 албан тушаалтны эсрэг визний хориг хэмжээ аваад буй юм. Түүнчлэн АНУ-ын дэд Ерөнхийлөгч Жо Байден өчигдөр /II.20/ Украины Ерөнхийлөгч Виктор Януковичтой утсаар холбогдон Вашингтоны зүгээс жагсагчдын эсрэг гал нээх зөвшөөрөл өгсөн Киевийн Засгийн газрын албан тушаалтнуудад дахин хориг арга хэмжээ авахаа анхааруулжээ.

Украины Ерөнхийлөгч Виктор Янукович өнгөрсөн арваннэгдүгээр сард Европын холбоонд нэгдэх гэрээнээс татгалзсанаас үүдэн ард иргэд түүний эсрэг жагсч эхэлсэн юм. Украинчуудын зүгээс Виктор Януковичийг ОХУ-ын нөлөөнд автаж, улс орны ашиг сонирхлын эсрэг шийдвэр гаргасанд буруутгаж буй юм. Үүний дараа Украины хууль тогтоогчид өнгөрсөн нэгдүгээр сард жагсагчдын эсэргүүцлийг дарахаар жагсаал, цуглааны эсрэг хууль баталсан нь бослого, үймээнийг өдүүлсэн билээ. Үүний  улмаас Киевт байдал хурцдаж, мөргөлдөөн гарч эхэлснийг Виктор Янукович сөрөг хүчнийхэнтэй тохиролцсоны үндсэн дээр жагсаал, цуглааны эсрэг хуулийг цуцалж, баривчлагдсан хүмүүсийг суллах шийдвэр гаргаж, үйл явдлыг түр намжаагаад байсан юм. Гэвч Украины Засгийн газар энэ долоо хоногийн эхээр Киевийн төв талбайгаас жагсагчдыг хүчээр тараах шийдвэр гаргаснаар дээрх байдал үүсээд байна. Иймээс Виктор Янукович Засгийн газрыг тарааж, ээлжит бус парламентын сонгууль явуулахаар болсныг Польшийн Ерөнхий сайд мэдэгджээ.