Хойд Америкийн гурван том орны төрийн тэргүүнүүд Мексик улсад уулзаж байна. Канадын Ерөнхий сайд Стивен Харпер, АНУ-ын Ерөнхийлөгч Барак Обама, Мексикийн төрийн тэргүүн Энрике Ньето нар бүс нутгийн худалдаа наймаа, цагаачлал, эрчим хүчний салбар дахь хамтын ажиллагааныхаа талаар авч хэлэлцэж байгаа аж. Энэ гурван орон 20 жилийн өмнөөс худалдаа наймааны салбарт хамтран ажиллаж ирсэн учраас тэдний чуулга уулзалтыг “Гурван найз”-ын уулзалт гэж нэрлэдэг аж.

Канадын Ерөнхий сайд өчигдөр /II.19/ эхэлсэн гурван орны чуулга уулзалтаас нэг өдрийн өмнө Мексикт хүрэлцэн ирж, Ерөнхийлөгч Энрике Ньетотой агаарын тээврийг өргөжүүлэх гэрээ байгуулсан байна. Түүнчлэн Канад улс АНУ-ын Засгийн газраас хоёр орны хооронд газрын тосны хоолой татах гол асуудалд эцсийн шийдвэрийг сонсохыг хүсч байгаа аж. Харин Мескикийн хувьд АНУ-ын цагаачлалын шинэчлэлийн талаар ихэд сонирхож байгаа гэнэ. Учир нь АНУ-д амьдарч, хөдөлмөрлөж буй 11 сая хууль бус цагаачдын ихэнхи нь Мексикийн иргэд байдаг юм.