Facebook-ийн гүйцэтгэх захирал Марк Зукерберг Skype-ийг худалдаж авах тухай хэлэлцэж байна. Гэхдээ хоёр талын хэлэлцээр анхан шатанд явагдаж байгаа ба Facebook тус компанийг худалдаж авах шийдэлд хүрвэл Skype гурваас дөрвөн тэрбум ам.доллараар үнэлэгдэх боломжтой юм.
Хэрэв хоёр талын гэрээ амжилттай болбол Facebook-ийн хэрэглэгчид тус сүлжээгээр видео дуудлага хийх боломжтой болно. Facebook, Skype нар хамтын хөрөнгө оруулалттай компаниуд болох тухай цуу мэдээ 2010 оны есдүгээр сараас эхлэлтэй хэдий ч хоёр компани тухайн үед тохиролцоонд хүрч чадаагүй ажээ. Харин энэ удаа хэлэлцээр нааштай болох төлөв аль аль талд нь ажиглагдаж байгаа тухай онлайн эх сурвалжууд мэдээлж байна.