Өнгөрсөн амралтын өдрүүдээр Францад хүч сорьсон Монголын жүдочид залгуулаад Итали болон Австрид болох Европын нээлттэй тэмцээнд зодоглохоор болжээ. Хоёрдугаар сарын 8, 9-нд болсон Парисын “Их дуулга”-д Монголын жүдочид алт, мөнгөн медаль нэжгээдийг хүртсэнээр багийн дүнгээр дэлхийн 75 орноос зургадугаар байрт шалгарсан билээ. Шигшээ багийнхан тэмцээнээ дуусгаад Парис хотноо Францын жүдо бөхийн шигшээ багийнхантай хамтарсан бэлтгэл хийсэн юм.

Энэ амралтын өдрүүдээр буюу хоёрдугаар сарын 15, 16-нд Австрийн Обервартад эрэгтэйчүүдийн, Италийн Ромд эмэгтэйчүүдийн нээлттэй тэмцээн болох тул Монголын жүдочид хоёр хуваагдаж, Францаас шууд Итали, Австрийг зорьжээ.