Төв Африкт хүмүүсийг хоморголон устгах ажиллагаа эрчимтэй болж байгааг НҮБ-аас мэдээлжээ. НҮБ-ын энхийн сахиулагчид Төв Африкийн нийслэлээс холгүй орших Селека босогчдын цэргийн хуарангаас хүмүүсийг олноор нь булсан том булш олсон нь үүнийг баталж буй гэнэ. Төв Африкийн мусульман шашны хэт даврагчид  хүн амыг зонхилогч христийн шашинтнуудын эсрэг цэвэрлэх ажиллагаа явуулж эхэлсэн аж. Тиймээс НҮБ-ын дүрвэгчдийн дээд комиссоос Төв Африкт хүмүүсийг хоморголон устгахын эсрэг олон улсын цэргийн арга хэмжээ яаралтай авахыг уриалсан байна.

Үүний зэрэгцээ Франц улсын зүгээс 1600 цэргээ Төв Африкт энхийг сахиулах ажиллагаа явуулж буй Африкийн холбооны 6000 цэрэгт тусламж үзүүлэхээр илгээгээд буй юм.

Төв Африкт өнгөрсөн жилийн гуравдугаар сараас хойш шашин хоорондын мөргөлдөөн гарснаас сая орчим хүн гэр орноосоо дүрвээд буй юм. Түүнчлэн өнгөрсөн нэгдүгээр сард Төв Африкийн төрийн эрхийг барьж байсан Селека босогчдын тэргүүн Мишель Жотодиа олон улсын шахалт, дарамтанд дор суудлаасаа огцорсон нь зөрчил мөргөлдөөнийг улам  өдөөжээ. Төв Африкийн хүн амын 15 хувийг мусульман шашинтнууд эзэлдэг байна.