Ази, номхон далайн бүс нутаг 2011 онд дэлхийн эдийн засгийг жолоодох нөлөөгөө хадгалах ч хүнс, шатахууны үнийн өсөлт, их хэмжээний хөрөнгийн тогтворгүй урсгал учруулж болзошгүй хэмээн шинжээчид дүгнэжээ. Гадаад харилцааны яаманд болсон бүс нутгийн нийгэм, эдийн засгийн 2011 оны тайланг сэтгүүлчдэд танилцуулах үеэр Үндэсний статистикийн хорооны дэд дарга Г.Гэрэлт-Од дээрх үгийг хэлээд энэ онд Ази номхон далайн бүсийн улс орны нийгэм, эдийн засгийн судалгааг танилцуулсан.
 
Энэ онд бүс нутгийн эдийн засгийн өсөлт буурахын сацуу хүнс, шатахууны үнэ өссөний улмаас ихэнх улс оронд инфляци нэмэгдэж болзошгүй байгаа аж. Хэрвээ хүнсний бараа бүтээгдэхүүний үнэ хоёр дахин өсч, баррель нефть 130 ам.долларт хүрвэл бүсийн ядуурлын хэмжээ өсч, ядуучуудын эгнээ 42 сая хүнээр нэмэгдэж болзошгүй гэнэ. Тиймээс бүс нутгийн орнууд эдийн засгийн бүтцээ тэнцвэржүүлэх шаардлагатайг НҮБ-ын Ерөнхий нарийн бичгийн даргын орлогч, Ази номхон далайн эдийн засаг, нийгмийн комиссын гүйцэтгэх нарийн бичгийн дарга Ноэлин Хайзер тэмдэглэв.